തിരുവനന്തപുരം:വയനാട് ഡിസിസി ട്രഷറര്‍ എന്‍എം വിജയനും മകനും വിഷം ഉളളില്‍ ചെന്ന് മരിച്ചതിനെ തുടര്‍ന്ന് ഉയര്‍ന്ന ആരോപണങ്ങളില്‍ വയനാട് എസ്പിക്ക് പരാതി നല്‍കി ഐ സി ബാലകൃഷ്ണന്‍ എംഎല്‍എ. പണം വാങ്ങാന്‍ ആര്‍ക്കും നിര്‍ദ്ദേശം നല്‍കിയിരുന്നില്ലെന്ന് എംഎല്‍എ പറഞ്ഞു.
എന്‍എം വിജയന്‍ എഴുതിയതായി പറയുന്ന കത്തും ഒപ്പിട്ട കരാര്‍ ഉടമ്പടിയും വ്യാജമാണ്. മാധ്യമങ്ങളിലൂടെ വ്യാജ രേഖകള്‍ പ്രചരിപ്പിക്കുന്നവര്‍ക്കെതിരെ നടപടി വേണമെന്ന് എം എല്‍ എ പരാതിയില്‍ ആവശ്യപ്പെടുന്നു. തന്റെ പേര് ഉപയോഗപ്പെടുത്തി ആരെങ്കിലും പണം വാങ്ങിയെങ്കില്‍ അന്വേഷണം വേണമെന്നും ഐ സി ബാലകൃഷ്ണന്‍ പറയുന്നു.
അതേ സമയം, വയനാട് ഡിസിസി ട്രഷറര്‍ എന്‍ എം വിജയന്റെയും മകന്റെയും ആത്മഹത്യയില്‍ സിപിഎം ബത്തേരി എംഎല്‍എ ഐസി ബാലകൃഷ്ണന്റെ ഓഫീസിലേക്ക് മാര്‍ച്ച് നടത്തി. അര്‍ബന്‍ ബാങ്ക് നിയമന തട്ടിപ്പിന് പിന്നില്‍ എംഎല്‍എക്ക് പങ്കുണ്ടെന്നും ഇതിനെ തുടര്‍ന്നുണ്ടായ സാമ്പത്തിക പ്രതിസന്ധിയാണ് മരണത്തിന് കാരണമെന്നുമാണ് സിപിഎം ആരോപണം. ഐസി ബാലകൃഷ്ണന്‍ രാജിവെക്കണമെന്നും എംഎല്‍എക്കെതിരെ ആത്മഹത്യ പ്രേരണ കുറ്റം ചുമത്തണമെന്നും സിപിഎം ആവശ്യപ്പെട്ടു.
