മണ്ണാര്ക്കാട്: റോഡിലെ പൊടിയും പുകയും കണ്ണുകളിലേക്ക് എത്തുന്നത് തടയുന്നതിനൊപ്പം മൊബൈല് ഫോണ് ചാര്ജ് ചെയ്യാനും സൗകര്യം. സംസ്ഥാന സ്കൂള് ശാസ്ത്രമേളയിലാണ് വേറിട്ട ഹെല്മെറ്റുമായി തൃശൂര് ചെന്ത്രാപ്പിന്നി എച്ച്എസ്എസിലെ പി.എച്ച്. ഹൃദ്യോജും ആര്യ ആദര്ശുംഎത്തിയത്. ഇരുചക്രവാഹന യാത്രക്കാര്ക്ക് സുരക്ഷയും സൗകര്യവും ഒരുപോലെ ഉറപ്പാക്കുകയെന്ന ലക്ഷ്യത്തോടെയാണ് ഇരുവരും പൊടി അകറ്റുന്ന ഹെല്മെറ്റ് രൂപകല്പ്പന ചെയ്തത്.ഹെല്മെറ്റിന്റെ മുകള്ഭാഗത്ത് സ്ഥാപിച്ചിരിക്കുന്ന ചെറിയ വായുതള്ളല്ഉപകരണങ്ങളാണ് ഇതിന്റെ പ്രധാന പ്രത്യേകത. ഇവയുടെ സഹായത്തോടെ മുഖത്തിന് മുന്നില് വായുകവചം സൃഷ്ടിക്കുന്നു. ഇതുവഴി റോഡിലെ പൊടിയും പുകയും കണ്ണുകളിലേക്ക് പ്രവേശിക്കുന്നത് തടയാനാകും.സൂര്യപ്രകാശത്തില്നിന്ന് ഊര്ജം ഉല്പ്പാദിപ്പിക്കുന്ന സൗരോര്ജ പാനലുംഹെല്മെറ്റിലുണ്ട്. ഇതിലൂടെ ലഭിക്കുന്ന ഊര്ജം വീണ്ടും ചാര്ജ് ചെയ്യാവുന്ന ബാറ്ററിയില് സംഭരിച്ചാണ് വായുപ്രവാഹ സംവിധാനം പ്രവര്ത്തിപ്പിക്കുന്നത്. മൊബൈല് ഫോണുകള് ചാര്ജ് ചെയ്യുന്നതിനായി പ്രത്യേക യുഎസ്ബി സംവിധാനവും ഒരുക്കിയിട്ടുണ്ട്. യാത്രക്കാര്ക്ക് ആവശ്യാനുസരണം വായുപ്രവാഹത്തിന്റെ വേഗം ക്രമീകരിക്കാനും സൗകര്യമുണ്ട്. കുറഞ്ഞത്, ഇടത്തരം, ഉയര്ന്നത് എന്നിങ്ങനെ മൂന്ന് തലങ്ങളില് വായുപ്രവാഹം നിയന്ത്രിക്കാന് തിരിക്കാവുന്ന സ്വിച്ച് നല്കിയിരിക്കുന്നു. ബാറ്ററിയില് ശേഷിക്കുന്ന ചാര്ജിന്റെ അളവ് അറിയാന് പ്രകാശസൂചകവുമുണ്ട്. പൊടിയും പുകയും നിറഞ്ഞ റോഡുകളിലെ യാത്രയില് സുരക്ഷയ്ക്കൊപ്പം കൂടുതല് സൗകര്യങ്ങളും ഒരുക്കുകയാണ് വിദ്യാര്ത്ഥികളുടെ ഈ കണ്ടുപിടിത്തം.















