ലഖ്നൗ: ഉത്തർപ്രദേശിലെ ഗോരഖ്പൂരിൽ സമാജ്വാദി പാർട്ടി അധ്യക്ഷൻ അഖിലേഷ് യാദവിന്റെ ‘പി.ഡി.എ. രഥയാത്ര’യ്ക്കിടെ ബുൾഡോസർ ഇടിച്ച് ബി.ജെ.പി. നേതാവിന്റെ 14 വയസ്സുകാരനായ മകൻ മരിച്ചു. സഹോദരിയെ കൂട്ടിക്കൊണ്ടുവരാൻ സ്കൂളിലേക്ക് പോകുന്നതിനായി റോഡ് മുറിച്ചുകടക്കുന്നതിനിടെ പിന്നിൽനിന്നെത്തിയ ബുൾഡോസർ ആര്യവർധനെ ഇടിക്കുകയായിരുന്നു.
കേന്ദ്രീയ വിദ്യാലയത്തിലെ പത്താം ക്ലാസ് വിദ്യാർഥിയായ ആര്യവർധൻ സിങ്ങാണ് മരിച്ചത്. ബുധനാഴ്ചയായിരുന്നു സംഭവം. അപകടത്തിന് ഉത്തരവാദികളായവർക്കെതിരെ കൊലക്കുറ്റത്തിന് കേസെടുക്കണമെന്ന് ആവശ്യപ്പെട്ട് കുട്ടിയുടെ കുടുംബാംഗങ്ങളും ബി.ജെ.പി. പ്രവർത്തകരും പ്രതിഷേധവുമായി രംഗത്തെത്തി. അഖിലേഷ് യാദവിനും പരിപാടിയുടെ സംഘാടകർക്കുമെതിരെ കേസെടുക്കണമെന്നാണ് ഇവരുടെ ആവശ്യം.പിതാവിന്റെ മൊഴി പ്രകാരം ഉച്ചയ്ക്ക് രണ്ടുമണിയോടെ അഖിലേഷ് യാദവിന്റെ വാഹനവ്യൂഹം പ്രദേശത്തുകൂടി കടന്നുപോകുന്നതിനിടെയാണ് അപകടമുണ്ടായത്.
പിതാവ് ഓംകാർ സിംഗ് ശ്രീനേത്ത് ഗോരഖ്പൂരിൽ ബി.ജെ.പി.യുടെ തിരഞ്ഞെടുപ്പ് കമ്മീഷൻ കോൺടാക്ട് വിഭാഗവുമായി ബന്ധപ്പെട്ട് പ്രവർത്തിക്കുന്നയാളാണ്. രഥയാത്രയുടെ ഭാഗമായി പൂക്കൾ വിതറിക്കൊണ്ടിരുന്ന ബുൾഡോസർ, അഖിലേഷ് യാദവിന്റെ വാഹനവ്യൂഹം കടന്നുപോയതിന് പിന്നാലെ അമിതവേഗത്തിൽ മുന്നോട്ടുപായുകയായിരുന്നു.ഇടിയുടെ ആഘാതത്തിൽ കുട്ടി റോഡ് ഡിവൈഡറിലേക്ക് തെറിച്ചുവീണു. തലയുടെ പിൻഭാഗത്ത് ആഴത്തിലുള്ള മുറിവുൾപ്പെടെ ഗുരുതരമായി പരിക്കേറ്റു. തൽക്ഷണം കുട്ടി മരിക്കുകയായിരുന്നു.
രഥയാത്രയുടെ നടത്തിപ്പിൽ ഗുരുതരമായ വീഴ്ചകളുണ്ടായെന്ന് ആരോപിച്ച ഓംകാർ സിംഗ്, മകന്റെ മരണത്തിന് സംഘാടകരെ ഉത്തരവാദികളാക്കി. അഖിലേഷ് യാദവിനെതിരെയും ക്രിമിനൽ നടപടി സ്വീകരിക്കണമെന്ന് അദ്ദേഹം ആവശ്യപ്പെട്ടു.രഥയാത്രയുടെ നടത്തിപ്പിൽ ഗുരുതരമായ വീഴ്ചകളുണ്ടായെന്ന് ആരോപിച്ച ഓംകാർ സിംഗ്, മകന്റെ മരണത്തിന് സംഘാടകരെ ഉത്തരവാദികളാക്കി. അഖിലേഷ് യാദവിനെതിരെയും ക്രിമിനൽ നടപടി സ്വീകരിക്കണമെന്ന് അദ്ദേഹം ആവശ്യപ്പെട്ടു.


















