പ്രാർത്ഥനകൾ വിഫലം : 140 അടി താഴ്‌ച്ചയുള്ള കുഴൽക്കിണറിൽ വീണ 10 വയസുകാരന് ദാരുണാന്ത്യം

ഭോപ്പാൽ: 140 അടി താഴ്‌ച്ചയുള്ള കുഴൽക്കിണറിൽ വീണ 10 വയസുകാരന് ദാരുണാന്ത്യം. മദ്ധ്യപ്രദേശിലെ ഗുണാജില്ലയിൽ ഇന്നലെ വൈകിട്ട് അഞ്ച് മണിയോടെയാണ് സംഭവം . 16 മണിക്കൂർ നീണ്ട രക്ഷാപ്രവർത്തനങ്ങൾ വിഫലമാക്കിയാണ് കുട്ടിയുടെ വേർപാട്.

സുമിത് മീന എന്ന ബാലനാണ് കുഴൽക്കിണറിലേയ്‌ക്ക് വീണത് . ഗുണാ ജില്ല ആസ്ഥാനത്തുനിന്ന് 50 കിലോമീറ്റർ അകലെയുള്ള പിപ്ലിയാ ഗ്രാമത്തിലാണ് അപകടമുണ്ടായത്. കുഴൽക്കിണറിന്റെ തുറന്നുകിടന്ന ഭാഗത്തുകൂടിയാണ് സുമിത് വീണത്. ഇന്ന് രാവിലെ ഒമ്പതരയോടെ സമാന്തരമായി കുഴി നിർമ്മിച്ച് സുമിതിനെ പുറത്തെടുത്തെങ്കിലും അബോധാവസ്ഥയിലായിരുന്നു.

തണുത്ത കാലാവസ്ഥയിൽ രാത്രി മുഴുവൻ ഇടുങ്ങിയ കുഴൽക്കിണറിലായിരുന്നു കുട്ടി. കൈകളും കാലുകളും നനഞ്ഞ് വീർത്ത നിലയിലായിരുന്നു. വായിൽ ചെളിയും കണ്ടെത്തി.ഉടൻ രഘോഗഡിലെ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ലെന്ന് ഗുണ പോലീസ് സൂപ്രണ്ട് സഞ്ജീവ് സിൻഹ പറഞ്ഞു .