നാഗ്പൂര്‍ : മഹാരാഷ്ടയില്‍ ദേവേന്ദ്ര ഫഡ്‌നാവിസ് മന്ത്രിസഭ വികസിപ്പിച്ചു.മന്ത്രിമാരായി 39 എംഎല്‍എമാരാണ് ഞായറാഴ്ച സത്യപ്രതിജ്ഞ ചെയ്തത്.
ഇവരുടെ വകുപ്പുകള്‍ പ്രഖ്യാപിച്ചിട്ടില്ല. നാഗ്പൂരിലെ രാജഭവനിലായിരുന്നു സത്യപ്രതിജ്ഞാചടങ്ങ് നടന്നത്. ബിജെപിയില്‍ നിന്ന് 19 പേരും
11 ശിവസേന എം.എല്‍.എമാരും 9 എന്‍സി.പി എം.എല്‍.എമാരും മന്ത്രിമാരായി.
ബി.ജെ.പി സംസ്ഥാന അദ്ധ്യക്ഷന്‍ ചന്ദ്രശേഖര്‍ ബവന്‍കുലെയാണ് ഇന്ന് ആദ്യം സത്യപ്രതിജ്ഞ ചെയ്തത്. രാധാകൃഷ്ണ വിഖെ പാട്ടീല്‍, ആശിഷ് ഷെലാര്‍, ചന്ദ്രകാന്ത് പാട്ടീല്‍, ഗിരീഷ് മഹാജന്‍, ഗണേഷ് നായിക്, മംഗള്‍ പ്രതാപ് ലോധ, ജയ്‌കുമാര്‍ റാവല്‍, പങ്കജ മുണ്ടെ, അതുല്‍ സാവെ എന്നിവരാണ് സത്യപ്രതിജ്ഞ ചെയ്ത മറ്റ് ബി.ജെ.പി മന്ത്രിമാര്‍.
ശിവസേന ഷിന്‍ഡെ വിഭാഗത്തില്‍ നിന്ന് ദാദാ ഭൂസെ, ശംഭുരാജ് ദേശായി, സഞ്ജയ് റാത്തോഡ്, ഗുലാബ്രാവു പാട്ടീല്‍, ഉദയ് സാമന്ത് എന്നിവരും മന്ത്രിമാരായി സത്യപ്രതിജ്ഞ ചെയ്തു. എന്‍സിപിയില്‍ നിന്ന് മണിക്‌റാവു കൊക്കാട്ടെ, ദത്താത്രയ് വിതോബ ഭാര്‍നെ, ഹസന്‍ മുഷ്രിഫ്, അദിതി സുനില്‍ തത്കരെ, ധനഞ്ജയ് മുണ്ടെ എന്നിവര്‍ സത്യപ്രതിജ്ഞ ചെയ്തു.
മുഖ്യമന്ത്രി ദേവേന്ദ്രഫഡ്‌നാവിസ്, ഉപമുഖ്യമന്ത്രിമാരായ ഏക്‌നാഥ് ഷിന്‍ഡെ, അജിത് പവാര്‍ എന്നിവരുടെ സാന്നിദ്ധ്യത്തിലായിരുന്നു ചടങ്ങ്.
