ന്യൂദല്ഹി: ലോക്സഭ, നിയമസഭാ തെരഞ്ഞെടുപ്പുകള് ഒരുമിച്ചും തുടര്ന്ന് 100 ദിവസത്തിനകം തദ്ദേശ സ്വയംഭരണ തെരഞ്ഞെടുപ്പുകളും നടത്താന് നിര്ദേശിക്കുന്ന ‘ഒരു രാജ്യം ഒരു തെരഞ്ഞെടുപ്പ്’ ബില്ലുകള് തിങ്കളാഴ്ച ലോക്സഭയില് അവതരിപ്പിക്കും. നിയമമന്ത്രി അര്ജുന് റാം മേഘ്വാളാണ് ബില്ല് അവതരിപ്പിക്കുക. ബില്ല് സംയുക്ത പാര്ലമെന്ററി സമിതിക്ക് വിട്ടേക്കും.
ബില്ലിന് നേരത്തെ കേന്ദ്രമന്ത്രിസഭ അംഗീകാരം നല്കിയിരുന്നു. തെരഞ്ഞെടുപ്പുകള് ഒരുമിച്ചു നടത്താനുള്ള നിര്ദേശത്തെക്കുറിച്ചു പഠിക്കാന് നിയോഗിച്ച മുന് രാഷ്ട്രപതി രാംനാഥ് കോവിന്ദിന്റെ നേതൃത്വത്തിലുള്ള ഉന്നതാധികാര സമിതിയുടെ റിപ്പോര്ട്ടിന്റെ അടിസ്ഥാനത്തിലാണ് ഭരണഘടനാ ഭേദഗതികള് അടക്കമുള്ള ബില്ലുകള്ക്ക് അംഗീകാരം നല്കിയത്.
1963ലെ ഗവൺമെൻ്റ് ഓഫ് യൂണിയൻ ടെറിട്ടറി ആക്ട്, 1991ലെ ഗവൺമെൻ്റ് ഓഫ് നാഷണൽ ക്യാപിറ്റൽ ടെറിട്ടറി ഓഫ് ദൽഹി ആക്ട്, 2019ലെ ജമ്മു കശ്മീർ പുനഃസംഘടന നിയമം എന്നിവ ഭേദഗതി ചെയ്യുന്നതിനുള്ള പ്രത്യേക ബില്ലും മേഘ്വാൾ അവതരിപ്പിക്കും. കഴിഞ്ഞ മാര്ച്ചിലാണ് കമ്മിറ്റി റിപ്പോര്ട്ട് സമര്പ്പിച്ചത്. രാജ്യത്തെ ഒരേ സമയം തെരഞ്ഞെടുപ്പ് നടത്തുക എന്ന ലക്ഷ്യമാണ് കമ്മിറ്റി മുന്നോട്ട് വച്ചത്. ലോക്സഭാ, നിയമസഭാ, തദ്ദേശ തെരഞ്ഞെടുപ്പുകള് ഒരുമിച്ച് നടത്താമെന്നായിരുന്നു നിര്ദേശം. ഇങ്ങനെ തെരഞ്ഞെടുപ്പ് നടത്തുന്നത് ചിലവ് കുറയ്ക്കാന് സഹായിക്കുമെന്നാണ് കേന്ദ്ര സര്ക്കാരിന്റെ നിരീക്ഷണം. എന്നാല് കോണ്ഗ്രസ് അടക്കമുള്ള പാര്ട്ടികള് ഇതിനെതിരേ രംഗത്തുവന്നിരുന്നു.
ലോക്സഭ, നിയമസഭ, തദ്ദേശസ്വയംഭരണ തിരഞ്ഞെടുപ്പുകള് എന്നിവ ഒരുമിച്ച് നടത്താന് ലക്ഷ്യമിട്ടുള്ള ഒരു രാജ്യം, ഒറ്റ തെരഞ്ഞെടുപ്പ് സംവിധാനം 2014 മുതല് മോദി സര്ക്കാര് മുന്നോട്ടുവെക്കുന്ന ആശയമാണ്. ആദ്യഘട്ടത്തിൽ ലോക്സഭാ, നിയമസഭാ തെരഞ്ഞെടുപ്പുകൾ ഒരുമിച്ച് നടത്താനും പിന്നീട് നൂറു ദിവസത്തിനുള്ളിൽ തദ്ദേശ സ്ഥാപനങ്ങളിലേക്കുള്ള തെരഞ്ഞെടുപ്പു നടത്താനുമാണ് കോവിന്ദ് പാനൽ നിർദേശിച്ചിരിക്കുന്നത്.
ഇന്ത്യയുടെ ജനാധിപത്യത്തെ ശക്തിപ്പെടുത്തുന്നതിനുള്ള സുപ്രധാന ചുവടുവയ്പ്പാണിതെന്ന് പ്രധാനമന്ത്രി നരേന്ദ്ര മോദി പറഞ്ഞു. ഒരേസമയം തെരഞ്ഞെടുപ്പ് നടത്തുന്നത് സമയവും വിഭവങ്ങളും ലാഭിക്കുമെന്നും ഭരണസംവിധാനത്തിന്റെ ഭാരം കുറയ്ക്കുമെന്നും സർക്കാർ ഉറപ്പിച്ചു പറയുന്നു.
