ന്യൂഡൽഹി : ഖലിസ്ഥാൻ ഭീകരൻ സത്നാം സിംഗ് സത്തയുടെ സഹോദരൻ സോണി എന്ന സുഖ്‌വീന്ദർ സിംഗിനെ അജ്ഞാതർ വെടിവച്ച് കൊന്നു . തിങ്കളാഴ്ച ഖാദൂർ സാഹിബിലാണ് സംഭവം. ബൈക്കിലെത്തിയ അജ്ഞാതർ മാർക്കറ്റിലേയ്‌ക്ക് പോകുകയായിരുന്ന സോണിയെ വെടിവച്ച് വീഴ്‌ത്തുകയായിരുന്നു . മൂന്ന് തവണ വെടിയേറ്റതായാണ് സൂചന . കൄത്യം നടത്തിയ ഉടൻ അജ്ഞാതർ രക്ഷപെട്ടതായും ദൃക്സാക്ഷികൾ പറയുന്നു
സോണിയെ സർക്കാർ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല . കഴിഞ്ഞ വർഷം മൊഹാലിയിലെ ഇൻ്റലിജൻസ് ഡിപ്പാർട്ട്‌മെൻ്റ് ഓഫീസിന് നേരെ നടന്ന ആക്രമണത്തിലെ പ്രതിയാണ് സത്നാം സിംഗ് സത്ത . ഇതിന് പിന്നാലെ സർഹാലി പൊലീസ് സ്റ്റേഷന് നേരെയും ആക്രമണം ഉണ്ടായി. ഈ രണ്ട് ആക്രമണങ്ങളുടെയും സൂത്രധാരൻ കാനഡ ആസ്ഥാനമായുള്ള ഭീകരൻ ലഖ്ബീർ സിംഗ് ലാൻഡയാണ്.
ലഖ്ബീർ സിങ്ങിന്റെ സഹായിയായ സത്നാം സിംഗ് സത്ത ഇപ്പോൾ യൂറോപ്പിൽ അഭയം തേടിയിരിക്കുകയാണ്. വ്യാപാരികൾ, കടയുടമകൾ, അഭിഭാഷകർ, ഡോക്ടർമാർ, രാഷ്‌ട്രീയക്കാർ എന്നിവരെ നിരന്തരം ഭീഷണിപ്പെടുത്തി പണം തട്ടിയിരുന്നയാളാണ് സത്ത .
