കണ്ണൂര് : പ്രസിദ്ധീകരിക്കാനിരിക്കുന്ന ആത്മകഥാ പുസ്തകത്തിന്റെ ഉളളടക്കം ഉപതെരഞ്ഞെടുപ്പ് ദിവസം പുറത്തു വന്നതിനെ തുടര്ന്നുളള വിവാദത്തില് മുതിര്ന്ന സിപിഎം നേതാവ് ഇ പി ജയരാജന്റെ മൊഴി പൊലീസ് രേഖപ്പെടുത്തി. കണ്ണൂര് കീച്ചേരിയിലെ വീട്ടിലെത്തിയാണ് പൊലീസ് ജയരാജന്റെ മൊഴിയെടുത്തത്.
തന്റെ ആത്മകഥയുടെ ഭാഗങ്ങളെന്ന പേരില് തെരഞ്ഞെടുപ്പ് ദിവസം ചില രേഖകള് പ്രചരിച്ചതിന് പിന്നില് ഗൂഢാലോചനയുണ്ടെന്ന് ചൂണ്ടിക്കാട്ടി ഇ പി ജയരാജന് പരാതി നല്കിയിരുന്നു. ഇതിലാണ് ജയരാജന്റെ മൊഴിയെടുത്തത്.
കോട്ടയത്ത് നിന്നുള്ള പൊലീസ് സംഘമാണ് മൊഴിയെടുത്തത്. ഇ പിയുടെ മൊഴിയുടെ വിശദാംശങ്ങള് പുറത്തുവന്നിട്ടില്ല. ആത്മകഥ പ്രസിദ്ധീകരിക്കാന് താന് നിലവില് കരാറുണ്ടാക്കിയിട്ടില്ലെന്നാണ് ഇ പി ജയരാജന്റെ വാദം. ഇതുള്പ്പെടെ പൊലീസ് പരിശോധിക്കും.
സിപിഎമ്മിനെയും ഇടതുമുന്നണിയെയും ഉള്പ്പെടെ വിമര്ശിക്കുന്ന പരാമര്ശങ്ങള് ഇ പിയുടെ ആത്മകഥയില് ഉണ്ടെന്നായിരുന്നു പുറത്തുവന്ന വാര്ത്തകള്. ആത്മകഥയുടെ മറവില് വ്യാജ രേഖകള് ഉണ്ടാക്കി തെറ്റായ പ്രചരണം നടത്തിയെന്ന് പരാതിയില് പറയുന്നു.
