കോട്ടയം: മാലിന്യമുക്തം നവകേരളം ജനകീയ ക്യാമ്പയിന്റെ ഭാഗമായി ജില്ലയിലെ കെ.എസ്.ആര്‍.ടി.സി. ബസ് സ്റ്റേഷനുകളില്‍ 24ന് ശുചീകരണം നടക്കും. കോട്ടയം, ചങ്ങനാശേരി, പൊന്‍കുന്നം, എരുമേലി, ഈരാറ്റുപേട്ട, പാലാ, വൈക്കം കെ.എസ്.ആര്‍.ടി.സി സ്റ്റേഷനുകളില്‍ ബന്ധപ്പെട്ട തദ്ദേശസ്ഥാപനങ്ങളുടെ നേതൃത്വത്തിലാണ് ശുചീകരണം .
സംസ്ഥാനതലത്തില്‍ ഹരിതകേരളം മിഷനും കെ.എസ്.ആര്‍.ടി.സി.യുമായി നടത്തിയ ചര്‍ച്ചയിലാണ് ജനകീയ ക്യാമ്പയിന്റെ ഭാഗമായി സംസ്ഥാനത്തെ 75 ഡിപ്പോകളില്‍ മെഗാ ശുചീകരണയജ്ഞം നടത്താന്‍ തീരുമാനിച്ചത്. ഹരിതകേരളം മിഷന്റെയും ശുചിത്വമിഷന്റെയും സഹകരണത്തോടെയാണ് തദ്ദേശസ്ഥാപനങ്ങളില്‍ ശുചീകരണ യജ്ഞം.
ആദ്യഘട്ടത്തില്‍ സംസ്ഥാനത്തെ 18 സ്റ്റേഷനുകളില്‍ ഖര-ദ്രവ മാലിന്യസംസ്‌കരണം തുടങ്ങിയ അടിസ്ഥാന സൗകര്യങ്ങള്‍ മെച്ചപ്പെടുത്തി ഹരിത കെ.എസ്.ആര്‍.ടി.സി. സ്റ്റേഷനുകളായി മാറ്റാനും തീരുമാനിച്ചിട്ടുണ്ട്. ജില്ലയില്‍ കോട്ടയം ബസ് സ്റ്റേഷനാണ് ഹരിത സ്റ്റേഷനായി മാറുക.
