പൊതുവെ പ്രായത്തെ ഉൾക്കൊള്ളാൻ മ‌ടിക്കുന്നവരാണ് സിനിമാ താരങ്ങളെന്ന് പറയാറുണ്ട്. കരിയറിലെ മുന്നോട്ട് പോക്കും ജനപ്രീതിയുമെല്ലാം മുന്നിൽ കണ്ട് പ്രായത്തെ തളച്ചിടാൻ ശ്രമിക്കുന്ന സിനിമാ താരങ്ങൾ ഏറെയാണ്. അമ്മ, അച്ഛൻ വേഷങ്ങൾ ചെയ്യാൻ പോലും പലപ്പോഴും താരങ്ങൾ മടിക്കാറുണ്ട്. ഇത്തരം വേഷങ്ങളിലേക്ക് സ്റ്റീരിയോടൈപ്പ് ചെയ്യപ്പെടുന്നതാണ് ഇതിന് കാരണം. എന്നാൽ പ്രായത്തെ അംഗീകരിച്ച് മുന്നോട്ട് പോകുന്ന അഭിനേതാക്കളും ഏറെയാണ്. മുഖത്തെ ചുളിവുകളോ മുടിയിലെ നരകളോ ഇവർ മറയ്‌ക്കാറില്ല.
ഇപ്പോഴിതാ നടി രേവതിയുടെ ഫോ‌ട്ടോകളാണ് സോഷ്യൽ മീഡിയയിൽ ശ്രദ്ധ നേടുന്നത്. സെറ്റിൽ നിന്നെടുത്ത ഫോട്ടോയാണ് രേവതി പങ്കുവെച്ചത്. നരച്ച മുടിയോടെയാണ് രേവതിയെ ഫോട്ടോകളിൽ കാണുന്നത്. 58 കാരിയാണ് രേവതി.
നിരവധി പേരാണ് ഫോട്ടോയ്‌ക്ക് കമന്റ് ചെയ്തത്. ഗ്രേസ്ഫുളായി പ്രായമാകുന്നു, സോൾട്ട് ആന്റ് പെപ്പർ ലുക്ക് നിങ്ങൾക്ക് ചേരുന്നുണ്ട് എന്നൊക്കെയാണ് കമന്റുകൾ. അടുത്തിടെ നടി ജ്യോതിർമയിയുടെ സോൾട്ട് ആന്റ് പെപ്പർ ലുക്കും സോഷ്യൽ മീഡിയയിൽ ശ്രദ്ധ നേ‌ടിയിരുന്നു
അഭിനയത്തിനൊപ്പം സംവിധാനത്തിലും രേവതി ശ്രദ്ധ നൽകുന്നു. രേവതി സംവിധാനം ചെയ്യുന്ന തമിഴ് വെബ്സീരീസ് അണിയറയിൽ ഒരുങ്ങുന്നുണ്ട്. ഡിസ്നി പ്ലസ് ഹോട്സ്റ്റാറിലാണ് ഈ സീരീസ് എത്തുക.
സിദ്ധാർത്ഥ് രാമസ്വാമിയാണ് കോ ഡയറക്ടർ. ഇദ്ദേഹം തന്നെയാണ് ഈ സീരീസിന്റെ സിനിമാട്ടോഗ്രാഫറും. ഒക്ടോബർ അഞ്ചിനാണ് ഷൂട്ട് തുടങ്ങിയത്. സലാം വെങ്കിയാണ് രേവതി സംവിധാനം ചെയ്ത ഒടുവിലത്തെ സിനിമ. കജോൾ ആണ് ചിത്രത്തിൽ പ്രധാന വേഷം ചെയ്തത്.
എൺ‌പതുകളിൽ മലയാളത്തിലെയും തമിഴിലെയും തിരക്കേറിയ നായിക നടിയായിരുന്ന രേവതി ശ്രദ്ധേയമായ നിരവധി വേഷങ്ങൾ ചെയ്തു. നിരൂപക പ്രശംസയും പുരസ്കാരങ്ങളും നേടിയ ഒരുപിടി സിനിമകൾ രേവതിക്ക് രണ്ട് ഭാഷകളിലും തുടരെ ലഭിച്ചു.
