തൃശൂര്‍:പെണ്‍കെണിയില്‍ പെടുത്തി 63 വയസുകാരനില്‍ നിന്ന് രണ്ടര കോടിയോളം രൂപ തട്ടിയെടുത്ത യുവതിയെയും യുവാവിനെയും പൊലീസ് പിടികൂടി.കൊല്ലം അഞ്ചാലുംമൂട് സ്വദേശികളായ സോജന്‍, ഷെമി എന്നിവരാണ് തൃശൂര്‍ ടൗണ്‍ വെസ്റ്റ് പൊലീസിന്റെ പിടിയിലായത്.
തട്ടിപ്പിനിരയായ തൃശൂര്‍ പൂങ്കുന്നം സ്വദേശി പൊലീസില്‍ പരാതി നല്‍കിയതോടെയാണ് പൊലീസ് ഇവരെ കണ്ടെത്തി അറസ്റ്റ് ചെയ്തത്
രണ്ട് വര്‍ഷം മുമ്പാണ് യുവതി 63 വയസുകാരനുമായി സാമൂഹ്യമാധ്യമത്തിലൂടെ പരിചയത്തിലായത്. അവിവാഹിതയാണെന്ന് തെറ്റിദ്ധരിപ്പിച്ച് ബന്ധം സ്ഥാപിച്ചു. ബന്ധം ശക്തമായതോടെ പല തവണയായി ഇയാളില്‍ നിന്ന് യുവതി പണം വാങ്ങി.കുറെ നാള്‍ കഴിഞ്ഞ് പണം നല്‍കാതായതോടെ ഭീഷണിയായി. ഭീഷണി വര്‍ദ്ധിച്ചതോടെയാണ് 63കാരന്‍ പരാതിയുമായി തൃശൂര്‍ വെസ്റ്റ് പൊലീസിനെ സമീപിച്ചത്.
63കാരനില്‍ നിന്ന് തട്ടിയെടുത്ത പണം കൊണ്ട് സോജനും ഷെമിയും ആഡംബര ജീവിതം നയിച്ചുവരികയായിരുന്നു എന്നാണ് പൊലീസ് പറയുന്നത്.
60 പവനിലധികം സ്വര്‍ണാഭരണങ്ങളും മൂന്ന് ആഡംബര കാറുകളും ഒരു ജീപ്പും ഒരു ബൈക്കും 63കാരനില്‍ നിന്ന് തട്ടിയെടുത്ത പണം കൊണ്ട്് ഇവര്‍ വാങ്ങി. ഇവ പൊലീസ് പിടിച്ചെടുത്തു. കൊല്ലത്തു നിന്ന് തൃശൂര്‍ വെസ്റ്റ് പൊലീസ് സ്‌റ്റേഷനില്‍ എത്തിച്ച ഇരുവരുടെയും അറസ്റ്റ് രേഖപ്പെടുത്തിയ ശേഷം കോടതിയില്‍ ഹാജരാക്കി. വേറെ തട്ടിപ്പുകള്‍ ഇവര്‍ നടത്തിയിട്ടുണ്ടോ എന്നത് ഉള്‍പ്പെടെയുള്ള കാര്യങ്ങള്‍ പൊലീസ് അന്വേഷിക്കുന്നുണ്ട്.
പ്രതികരിക്കാൻ ഇവിടെ എഴുതുക: