ന്യൂദൽഹി: ദേശീയ തലസ്ഥാനത്തെ പാലിക ബസാറിൽ നിന്ന് മൊബൈൽ നെറ്റ്‌വർക്ക് ജാമർ പിടിച്ചെടുത്തതായി ദൽഹി പോലീസ് അറിയിച്ചു. ദീപാവലിക്ക് മുന്നോടിയായുള്ള പരിശോധനയ്‌ക്കിടെയാണ് നടപടി.
ദൽഹിയിൽ പോലീസ് സംഘം ഉത്സവ സീസണിന് മുന്നോടിയായി എല്ലാ കടകളിലും ഹോട്ടലുകളിലും മറ്റ് പൊതു സ്ഥലങ്ങളിലും പരിശോധന നടത്തുന്നുണ്ട്. ഈ പരിശോധനയ്‌ക്കിടെ സംശയാസ്പദമായ ഒരു വസ്തു മാർക്കറ്റിൽ കണ്ടെത്തിയെന്ന്ഡെപ്യൂട്ടി പോലീസ് കമ്മീഷണർ ദേവേഷ് കുമാർ മഹ്ല പറഞ്ഞു.
വിശദമായ പരിശോധനയിൽ മൊബൈൽ നെറ്റ്‌വർക്ക് ജാമിംഗ് ഉപകരണം പോലെ പ്രവർത്തിക്കുന്നവസ്തുവാണിതെന്ന് തിരിച്ചറിയുകയായിരുന്നു എന്നും അദ്ദേഹം പറഞ്ഞു. കൂടാതെ സംശയാസ്പദമായ എന്തെങ്കിലും ലേഖനമോ വസ്തുക്കളോ കണ്ടാൽ ഉടൻ തന്നെ പോലീസിനെ അറിയിക്കണമെന്ന് തങ്ങൾ ദൽഹിയിലെ പ്രദേശവാസികളോട് ആവശ്യപ്പെട്ടിട്ടുണ്ടെന്നും മഹ്ല പറഞ്ഞു.
