പാലക്കാട്: മതേതര വോട്ട് എന്താണെന്ന കാര്യത്തില്‍ കോണ്‍ഗ്രസും സിപിഎമ്മും നിലപാട് വ്യക്തമാക്കണമെന്ന് ബിജെപി സംസ്ഥാന അധ്യക്ഷന്‍ കെ. സുരേന്ദ്രന്‍. ഒരു വിഭാഗത്തിന്റെ വോട്ട് മാത്രം മതേതരവും മറ്റുള്ളവരുടേത് വര്‍ഗീയവുമാകുന്നതെങ്ങനെയാണെന്നും പാലക്കാട് മാധ്യമപ്രവര്‍ത്തകരോട് സംസാരിക്കവെ അദ്ദേഹം പറഞ്ഞു.
സ്വന്തം പാര്‍ട്ടിക്ക് വോട്ട് ചെയ്തവരെയാണ് സിപിഎം വര്‍ഗീയ വാദികളാക്കുന്നത്. കോടതിയില്‍ പി.പി. ദിവ്യയ്‌ക്കുവേണ്ടി സിപിഎം അവതരിപ്പിച്ച വാദങ്ങളെല്ലാം എഡിഎം നവീന്‍ ബാബുവിനെ അപകീര്‍ത്തിപ്പെടുത്തുന്നതാണ്. ഒരേസമയം ഇരയ്‌ക്കൊപ്പവും വേട്ടക്കാരനൊപ്പവും നിലകൊള്ളുകയാണ് സിപിഎം. ദിവ്യയെ സര്‍ക്കാര്‍ സംരക്ഷിക്കുകയാണ്.
50 കോടി രൂപ കൊടുത്ത് കേരളത്തില്‍ രണ്ട് എംഎല്‍എമാരെ വിലയ്‌ക്കുവാങ്ങും എന്നൊക്കെ പറയുന്നത് വിശ്വാസയോഗ്യമല്ലെന്ന് സുരേന്ദ്രന്‍ പറഞ്ഞു. ബിജെപിക്ക് ഇതിന്റെ ആവശ്യമില്ല. രണ്ട് എംഎല്‍എമാരെ കിട്ടിയിട്ട് തോമസ് കെ. തോമസിന് എന്ത് ചെയ്യാനാണ്. ഇതെല്ലാം ശ്രദ്ധ മാറ്റാനുള്ള രാഷ്‌ട്രീയ നാടകങ്ങളാണ്. എ.കെ. ശശീന്ദ്രനെ മന്ത്രിയായി നിലനിര്‍ത്തി വനംവകുപ്പില്‍ കൈയിട്ടുവാരാനാണ് സിപിഎം ശ്രമിക്കുന്നത്. മുഖ്യമന്ത്രിയും മരുമകന്‍ മന്ത്രിയും നേരിട്ട് ആ വകുപ്പ് ഭരിക്കുകയാണ്. ശശീന്ദ്രനെ വെച്ച് കാര്യങ്ങളൊക്കെ സിപിഎം തന്നെയാണ് നടത്തുന്നതെന്നും കെ. സുരേന്ദ്രന്‍ പറഞ്ഞു.
