ഭുവനേശ്വര്‍: ആദ്യം തന്നെ രണ്ട് ഗോളിന് മുന്നിട്ടു നിന്ന ശേഷം വിജയം കളഞ്ഞുകുളിച്ച് കേരള ബ്ലാസ്റ്റേഴ്സ്. ഓഡീഷ എഫ്‌സിക്കെതിരെ 2-2 സമനിലയിലാണ് പിരിഞ്ഞത്.
സീസണില്‍ ഇതുവരെ നാല് കളികള്‍ പിന്നിടുമ്പോള്‍ ഒരു ജയം മാത്രമാണ് ടീമിന് നേടാനായിട്ടുള്ളത്. തുടരെ രണ്ടാം എവേ മത്സരവും സമനിലയിലാക്കാന്‍ സാധിച്ചത് ആശ്വാസകരമാണ്. കഴിഞ്ഞ കളിയും സമനിലയില്‍ പിരിഞ്ഞിരുന്നു. ഇതുവരെ ഒരു ജയവും ഒരു തോല്‍വിയും മാത്രം നേരിട്ടിട്ടുള്ള ബ്ലാസ്‌റ്റേഴ്‌സിന് ആകെ അഞ്ച് പോയിന്റ് മാത്രമാണുള്ളത്.
എതിര്‍ത്തട്ടകത്തില്‍ ഇന്നലെ നടന്ന മത്സരത്തില്‍ ബ്ലാസ്റ്റേഴ്സ് ആണ് ആദ്യ രണ്ട് ഗോളുകളും നേടിയത്. 18 മിനിറ്റായപ്പോള്‍ നോഹ് സദോയിയിലൂടെ മുന്നിലെത്തി. മൂന്ന് മിനിറ്റിനകം ജെസ്യൂസ് ജിമിനെസ് ലീഡ് വര്‍ദ്ധിപ്പിച്ചു. മഞ്ഞപ്പടയുടെ ഈ സന്തോഷത്തിന് എട്ട് മിനിറ്റിന്റെ ആയുസേ ഉണ്ടായിരുന്നുള്ളൂ. ദാനഗോളില്‍ ഓഡീഷ ഒരു ഗോള്‍ സ്വന്തമാക്കി. 36-ാം മിനിറ്റില്‍ ഡീഗോ മൗറീഷിയോയിലൂടെ ഓഡീഷ രണ്ടാം ഗോളും മടക്കി. ആദ്യ പകുതിയില്‍ തന്നെ കളിയിലെ നാല് ഗോളും പിറന്നു. രണ്ടാം പകുതി ഗോള്‍രഹിതമായതോടെ മത്സരം സമനിലയില്‍ കലാശിച്ചു.
