കണ്ണൂര്: പി വി അന്വര് എം എല് എ തനിക്കെതിരെ നടത്തിയ അപകീര്ത്തികരമായ പരാമര്ശങ്ങളില് പാര്ട്ടിയുമായി ആലോചിച്ച് നിയമനടപടി സ്വീകരിക്കുമെന്ന് മുഖ്യമന്ത്രിയുടെ പൊളിറ്റിക്കല് സെക്രട്ടറി പി ശശി.
പി വി അന്വറിനെതിരെ അന്വറിന്റെ ആരോപണങ്ങളുമായി ബന്ധപ്പെട്ട് പാര്ട്ടിയും മുഖ്യമന്ത്രിയും പറയുന്നതിന് അപ്പുറം വ്യക്തിപരമായി ഒന്നും പറയാനില്ലെന്നും ശശി പറഞ്ഞു. ‘അന്വര് എന്തും പുറത്ത് വിട്ടോട്ടെ, അന്വര് അറ്റാക്ക് ചെയ്താലും കുഴപ്പമില്ല’. നിങ്ങള് മാധ്യമങ്ങള് എന്തിനാണ് എന്നെ അറ്റാക്ക് ചെയ്യുന്നതെന്നായിരുന്നു ശശി ചോദിച്ചത്.എത്ര ഗുരുതര ആരോപണമാണെങ്കിലും കൂടുതല് ഒന്നും പറയാനില്ല.കണ്ണൂരില് കോടിയേരി ബാലകൃഷ്ണന് അനുസ്മരണത്തില് പങ്കെടുത്ത് മടങ്ങവെയാണ് ശശിയുടെ പ്രതികരണം.
അതിനിടെ, പി ശശിക്കെതിരെ സിപിഎം സെക്രട്ടറിക്ക് നല്കിയ പരാതി പിവി അന്വര് പുറത്തുവിട്ടു. സ്വര്ണക്കടത്തിന്റെ പങ്ക് പറ്റുന്നുവെന്നും കേസുകളില് ഒത്ത് തീര്പ്പുണ്ടാക്കി ലക്ഷങ്ങള് കൈപ്പറ്റുന്നു, എന്നതടക്കം ഗൗരവകരമായ ആക്ഷേപങ്ങളാണ് ശശിക്കെതിരെ പരാതിയില് അന്വര് ഉന്നയിക്കുന്നത്.സോളാര് കേസില് പ്രതികള്ക്ക് രക്ഷപ്പെടാന് അവസരം ഒരുക്കിയതിലും എഡിജിപി അജിത് കുമാറിനൊപ്പം ശശിയുമുണ്ട്. മുഖ്യമന്ത്രിയുടെ ഓഫീസില് പരാതി നല്കാനെത്തുന്ന സ്ത്രീകളുടെ ഫോണ് നമ്പര് വാങ്ങി ശൃംഗാര ഭാവത്തില് ഇടപെടുന്നു എന്നിങ്ങനെ പോകുന്നു പരാതി.
