ഇടുക്കി: പിക്കപ്പ് വാന് പിന്നോട്ട് എടുക്കുന്നതിനിടെ അപകടത്തില്പ്പെട്ട് നാല് വയസുകാരന് ദാരുണാന്ത്യം. വാഹനത്തിനടിയില്പ്പെട്ടാണ് നാലു വയസുകാരന് മരിച്ചത്. ഇരട്ടയാര് ശാന്തിഗ്രാം നാലു സെന്റ് കോളനിയിലെ ശ്രാവണ് ആണ് മരിച്ചത്. അനൂപ് – മാലതി ദമ്പതികളുടെ ഇളയ മകനാണ്. അബദ്ധത്തില് വാഹനത്തിനടിയില് കുടുങ്ങുകയായിരുന്നുവെന്ന് സംഭവ സ്ഥലത്തുണ്ടായിരുന്നവര് പറഞ്ഞു. ഞായറാഴ്ച വൈകിട്ടാണ് അപകടമുണ്ടായത്.
കുടുംബശ്രീ യോഗത്തിന് അമ്മയ്ക്കൊപ്പം എത്തിയതായിരുന്നു ശ്രാവണ്. അതിനിടെ പിക്കപ്പ് ഡ്രൈവര് കുട്ടിയുടെ അമ്മയ്ക്ക് നല്കാനുള്ള പണവുമായി വന്നു. ഡ്രൈവര് വാഹനം നിര്ത്തി സംസാരിക്കുന്നതിനിടയില് അമ്മയ്ക്ക് പിന്നാലെ കുട്ടിയും വാഹനത്തിന് സമീപത്തേക്ക് വന്നു.
ശ്രാവണ് നില്ക്കുന്നതറിയാതെ ഡ്രൈവര് വാഹനം എടുത്തതാണ് അപകട കാരണമെന്ന് സംഭവ സ്ഥലത്തുണ്ടായിരുന്നവര് പറഞ്ഞു. കുട്ടിയെ ഉടന് തന്നെ ആശുപത്രിയിലെത്തിച്ചെങ്കിലും മരണം സംഭവിച്ചു. കട്ടപ്പന പൊലീസ് മേല് നടപടി സ്വീകരിച്ചു. പോസ്റ്റുമോര്ട്ടത്തിന് ശേഷം മൃതദേഹം ഇന്ന് ബന്ധുക്കള്ക്ക് നല്കും. സംസ്കാരം തിങ്കളാഴ്ച 3.30 ന് വീട്ടുവളപ്പില് നടക്കും. ശ്രാവണിന്റെ സഹോദരി വൈഗ രണ്ടാം ക്ലാസ് വിദ്യാര്ത്ഥിനിയാണ്.
