ചെന്നൈ: തമിഴ്നാട്ടില് വിജയദശമി പഥസഞ്ചലനത്തിന് അനുമതി തേടി ആര്‍എസ്എസ് പ്രവര്‍ത്തകര്‍ മദ്രാസ് ഹൈക്കോടതിയെ സമീപിച്ചു.
ഒക്ടോബര്‍ ആറിന് സംസ്ഥാനത്തൊട്ടാകെയുള്ള 58 സ്ഥലങ്ങളില്‍ പഥസഞ്ചലനം നടത്തുന്നതിന് അനുമതി തേടിയിട്ടും പോലീസ് സഹകരിക്കാത്ത സാഹചര്യത്തിലാണ് നീക്കം. പഥസഞ്ചലനം തടസം കൂടാതെ നടത്താന്‍ അനുവാദം നല്കണമെന്ന് തമിഴ്നാട് സര്‍ക്കാരിനോടും പോലീസിനോടും നിര്‍ദേശിക്കണമെന്ന് ആവശ്യപ്പെട്ടാണ് ഹര്‍ജി. തിരുപ്പൂരിലെ ആര്‍എസ്എസ് പ്രവര്‍ത്തകന്‍ എം. ജ്യോതിപ്രകാശ്, ഡിണ്ടിഗലില്‍നിന്നുള്ള പ്രവര്‍ത്തകന്‍ കെ. സേതുരാജ് എന്നിവരാണ് ഹര്‍ജിക്കാര്‍.
പഥസഞ്ചലനം നടത്തുന്നതിന് ഹൈക്കോടതി പോയ വര്‍ഷം നല്കിയിട്ടുള്ള മാര്‍ഗനിര്‍ദേശങ്ങള്‍ പാലിക്കുകയും ഇക്കുറി ആവശ്യമായ അപേക്ഷകള്‍ സമര്‍പ്പിക്കുകയും ചെയ്തിട്ടും പോലീസ് പ്രതികരിക്കുന്നില്ല. അതുകൊണ്ട് പരിപാടിയുടെ ഒരുക്കങ്ങളുമായി മുന്നോട്ട് പോകാന്‍ സമയബന്ധിതമായ അനുമതി ആവശ്യമാണെന്ന് ഹര്‍ജിയില്‍ പറയുന്നു.
ജസ്റ്റിസ് ജി. ജയചന്ദ്രന്‍ ഇരുവശത്തുനിന്നും വാദങ്ങള്‍ കേട്ട ശേഷം, ഹര്‍ജിക്കാരുടെ അപേക്ഷകള്‍ പരിശോധിക്കാന്‍ സര്‍ക്കാരിനും പോലീസിനും സമയം അനുവദിച്ചു. 25ന് മുമ്പ് അപേക്ഷകള്‍ പരിഗണിക്കണം. കേസ് ഇന്ന് വാദം കേള്‍ക്കും.
