തിരുവനന്തപുരം: നെയ്യാറ്റിന്കരയില് മണ്ണിടിഞ്ഞ് വീണ് കുടുങ്ങിയ തൊഴിലാളിയെ ഒരു മണിക്കൂറിലധികം നീണ്ട സാഹസിക രക്ഷാപ്രവര്ത്തനത്തൊടുവില് രക്ഷപ്പെടുത്തി പുറത്തെത്തിച്ചു. ചൊവ്വാഴ്ച ഉച്ചയോടെയാണ് നെയ്യാറ്റിന്കര ആനാവൂരില് പറമ്പിലെ മണ്ണിടിഞ്ഞ് തൊഴിലാളിയുടെ മുകളിലേക്ക് വീണത്.
നെയ്യാറ്റിന്കര ആലത്തൂര് സ്വദേശി ശൈലനാണ് മണ്ണിനടിയില് പെട്ടത്. ഉടന് തന്നെ ശൈലനെ രക്ഷിക്കാനുള്ള ശ്രമവും ആരംഭിച്ചു.
ശരീരത്തിലെ മണ്ണ് നീക്കം ചെയ്തെങ്കിലും ശൈലന്റെ കാല് ഭാഗം മണ്ണിനടിയില് കുടുങ്ങിയത് രക്ഷാപ്രവര്ത്തനം ദുഷ്കരമാക്കി.പൊലീസും അഗ്നിശമന സേനയും നാട്ടുകാരും ചേര്ന്നാണ് രക്ഷാപ്രവര്ത്തനം നടത്തിയത്.
ഉച്ചയ്ക്ക് രണ്ട് മണിയോടെയാണ് ശൈലനെ മണ്ണില് നിന്ന് പുറത്തെടുത്തത്. സ്ട്രച്ചറില് പുറത്തെത്തിച്ചശേഷം വാഹനത്തില് ആശുപത്രിയിലേക്ക് മാറ്റി. തോട്ടത്തില് മണ്ണെടുക്കവെയാണ് മണ്ണിടിഞ്ഞത്.
