കൊച്ചി: എയര് ഇന്ത്യ എക്സ്പ്രസ് ഫ്ളാഷ് സെയില്’ആരംഭിച്ചു. വെറും 932 രൂപ മുതല് ടിക്കറ്റ് നിരക്ക് ആരംഭിക്കും. 2025 മാര്ച്ച് 31 വരെയുള്ള യാത്രകള്ക്കായി സെപ്റ്റംബര് 16 വരെ എയര് ഇന്ത്യ എക്സ്പ്രസ് വെബ്സൈറ്റിലൂടെയും മൊബൈല് ആപ്പിലൂടെയും ബുക്ക് ചെയ്യുന്ന ടിക്കറ്റുകള്ക്കാണ് ഈ നിരക്ക് ബാധകം.
മറ്റ് ബുക്കിങ് ചാനലുകളിലൂടെ ബുക്ക് ചെയ്യുന്ന ടിക്കറ്റുകള് 1,088 രൂപ മുതലുള്ള എക്സ്പ്രസ് വാല്യൂ നിരക്കിലും ലഭിക്കും. ഓണക്കാലത്ത് മലയാളികള് ഏറ്റവുമധികം ആശ്രയിക്കുന്ന കൊച്ചി-ബംഗളൂരു, ബംഗളൂരു-ചെന്നൈ മുതല് ദല്ഹി-ഗ്വാളിയര്, ഗുവാഹാട്ടി-അഗര്ത്തല തുടങ്ങി നിരവധി റൂട്ടുകളില് ഓഫര് നിരക്കില് ടിക്കറ്റുകള് ലഭ്യമാണ്.
വെബ്സൈറ്റിലൂടെ ബുക്ക് ചെയ്ത് ചെക്ക് ഇന് ബാഗേജ് ഇല്ലാതെ എക്സ്പ്രസ് ലൈറ്റ് നിരക്കുകളില് യാത്ര ചെയ്യുന്നവര്ക്ക് മൂന്നുകിലോ അധിക കാബിന് ബാഗേജ് നേരത്തേ ബുക്ക് ചെയ്താല് സൗജന്യമായി ലഭിക്കും.
കൂടുതല് ലഗേജ് ഉള്ളവര്ക്ക് ആഭ്യന്തര വിമാനങ്ങളില് 15 കിലോ ചെക്ക് ഇന് ബാഗേജിന് 1,000 രൂപയും അന്താരാഷ്ട്ര വിമാനങ്ങളില് 20 കിലോയ്ക്ക് 1,300 രൂപയുമാണ് ഈടാക്കുക.
