കൊച്ചി: നടന്‍ നിവിന്‍ പോളിക്കെതിരെയുളള പീഡന പരാതിയില്‍ യുവതിയുടെ മൊഴി രേഖപ്പെടുത്തി. 2023 ഡിസംബര്‍ 14, 15 തീയതികളില്‍ ദുബായില്‍വച്ച് ലൈംഗിക അതിക്രമം നേരിട്ടു എന്നാണ് യുവതിയുടെ പരാതി.
എന്നാല്‍ ആ ദിവസങ്ങളില്‍ നിവിന്‍ പോളി കൊച്ചിയില്‍ ഉണ്ടായിരുന്നുവെന്ന തെളിവുകള്‍ പുറത്തുവന്നിട്ടുണ്ട്. എന്നാല്‍ പീഡനം നടന്ന തീയതി താന്‍ പറഞ്ഞത് ഉറക്കപ്പിച്ചിലെന്നാണെന്ന് അന്വേഷണ സംഘത്തിന് യുവതി മൊഴി നല്‍കിയത്.
അതിനിടെ അന്വേഷണ സംഘം തന്റെ വരുമാന വിവരങ്ങള്‍ തിരക്കാനാണ് വിളിച്ചതെന്ന് യുവതി മൊഴിയെടുക്കലിന് ശേഷം പറഞ്ഞു. കേസ് അട്ടിമറിക്കുമോ എന്ന് സംശയിക്കുന്നുവെന്നും യുവതി ആരോപിച്ചു. പൊലീസ് സത്യം അന്വേഷിച്ച് കണ്ടെത്തട്ടെയെന്നും യുവതി പ്രതികരിച്ചു.
എന്നാല്‍ കോതമംഗലം സ്വദേശിനിയായ യുവതിയുടെ ആരോപണങ്ങളില്‍ ഗൂഡാലോചനയുണ്ടെന്നും വിശദ അന്വേഷണം വേണമെന്നും ആവശ്യപ്പെട്ട് നിവിന്‍ പോളി ഡിജിപിക്ക് പരാതി നല്‍കിയിട്ടുണ്ട്.കേസ് അന്വേഷിക്കുന്ന പ്രത്യേക അന്വേഷണ സംഘത്തിനും നടന്‍ പരാതിയുടെ പകര്‍പ്പ് നല്‍കിയിട്ടുണ്ട്.
