ന്യൂദൽഹി : ജമ്മു കശ്മീരിൽ വരാനിരിക്കുന്ന നിയമസഭാ തിരഞ്ഞെടുപ്പിന് ഒരുങ്ങുമ്പോൾ കേന്ദ്രമന്ത്രി അമിത് ഷാ രണ്ട് ദിവസത്തെ സന്ദർശനത്തിനായി ഇന്ന് സംസ്ഥാനത്ത് എത്തും. അദ്ദേഹം പാർട്ടിയുടെ പ്രകടന പത്രിക പുറത്തിറക്കുമെന്നാണ് അറിയാൻ കഴിയുന്നത്.
സന്ദർശനത്തിൽ പാർട്ടിയുടെ സങ്കൽപ് പത്രയ്‌ക്ക് ഇന്നും നാളെയുമായി അമിത് ഷാ പാർട്ടി പ്രവർത്തകരെ കാണുകയും സംവദിക്കുകയും ചെയ്യും. ജമ്മു കശ്മീർ തീവ്രവാദ കേന്ദ്രങ്ങളിൽ നിന്ന് വിനോദസഞ്ചാര കേന്ദ്രമായി മാറിയെന്ന് പറഞ്ഞ ഷാ പ്രദേശത്ത് സമാധാനത്തിന്റെയും വികസനത്തിന്റെയും ഒരു പുതിയ യുഗം കൊണ്ടുവന്നതിന് മോദി സർക്കാരിനെ പ്രശംസിച്ചു.
മോദി സർക്കാരിന് കീഴിൽ സമാധാനത്തിന്റെയും വികസനത്തിന്റെയും പുതിയ യുഗത്തിന് ജമ്മു കശ്മീർ സാക്ഷ്യം വഹിക്കുന്നു. വിദ്യാഭ്യാസ-സാമ്പത്തിക പ്രവർത്തനങ്ങളുടെ വർദ്ധനയോടെ ഈ പ്രദേശം ഒരു തീവ്രവാദ കേന്ദ്രത്തിൽ നിന്ന് ടൂറിസ്റ്റ് ഹോട്ട്‌സ്‌പോട്ടായി മാറിയെന്നും അദ്ദേഹം എക്സിൽ പറഞ്ഞു.
അതേ സമയം ഇന്നലെ ബിജെപി ജമ്മു കശ്മീർ അധ്യക്ഷൻ രവീന്ദർ റെയ്ന നൗഷേര നിയമസഭാ മണ്ഡലത്തിൽ നിന്ന് നിയമസഭാ തെരഞ്ഞെടുപ്പിൽ നാമനിർദ്ദേശ പത്രിക സമർപ്പിച്ചു. കേന്ദ്രഭരണ പ്രദേശത്തുടനീളം ബിജെപിയുടെ ശക്തമായ തരംഗം ഉണ്ടെന്നും റെയ്ന പറഞ്ഞു.
ജമ്മു കശ്മീരിൽ 90 അസംബ്ലി മണ്ഡലങ്ങളുണ്ട്, 7 സീറ്റുകൾ പട്ടികജാതി (എസ്‌സി)കൾക്കും 9 പട്ടികവർഗ്ഗക്കാർക്കും (എസ്‌ടി) സംവരണം ചെയ്തിട്ടുണ്ട്. കഴിഞ്ഞ നിയമസഭാ തിരഞ്ഞെടുപ്പിൽ പീപ്പിൾസ് ഡെമോക്രാറ്റിക് പാർട്ടി (പിഡിപി) 28 സീറ്റുകളും ഭാരതീയ ജനതാ പാർട്ടി (ബിജെപി) 25 സീറ്റുകളും ജമ്മു കശ്മീർ നാഷണൽ കോൺഫറൻസ് (എൻസി) 15 സീറ്റുകളും കോൺഗ്രസ് 12 സീറ്റുകളും നേടി.
അതേ സമയം തെരഞ്ഞെടുപ്പിനെ നേരിടാൻ കോൺഗ്രസ് നാഷണൽ കോൺഫറൻസുമായി സഖ്യത്തിലാണ്. ജമ്മു കശ്മീരിൽ മൂന്ന് ഘട്ടങ്ങളിലായി സെപ്റ്റംബർ 18, 25, ഒക്ടോബർ 1 തീയതികളിൽ വോട്ടെടുപ്പ് നടക്കും, ഫലം ഒക്ടോബർ 8 ന് പ്രഖ്യാപിക്കും.
