കൊച്ചി : ആലത്തൂര് പൊലീസ് സ്റ്റേഷനില് അഭിഭാഷകനോട് അപമര്യാദയായി പെരുമാറിയ സംഭവത്തില് എസ്ഐയെ രണ്ട് മാസത്തെ തടവിന് ശിക്ഷിച്ച് ഹൈക്കോടതി. എസ് ഐ റിനീഷിനെ രണ്ടു മാസത്തെ തടവിനാണ് ജസ്റ്റിസ് ദേവരാമചന്ദ്രന് ശിക്ഷ വിധിച്ചത്.
എന്നാല് എസ് ഐ തല്ക്കാലം ജയിലില് പോകേണ്ടതില്ല. ഒരു വര്ഷത്തേക്ക് സമാന കുറ്റകൃത്യത്തില് ഏര്പ്പെടരുതെന്ന് കോടതി നിര്ദ്ദേശം നല്കി ശിക്ഷ മരവിപ്പിച്ചു.
സംഭവത്തില് നേരത്തെ എസ്ഐ ഹൈക്കോടതിയില് നിരുപാധികം മാപ്പപേക്ഷിച്ചിരുന്നു. ഇത് കോടതി അംഗീകരിച്ചിരുന്നു. അഭിഭാഷകനായ അക്വിബ് സുഹൈല് നല്കിയ കോടതിയലക്ഷ്യ ഹര്ജിയിലായിരുന്നു ഹൈക്കോടതി നടപടി
വാഹനാപകടവുമായി ബന്ധപ്പെട്ട കേസില് വാഹനം വിട്ടുനല്കാനുള്ള കോടതി ഉത്തരവുമായി പൊലീസ് സ്റ്റേഷനിലെത്തിയ അഭിഭാഷകനോട് എസ്ഐ റിനീഷ് അപമര്യാദയായി പെരുമാറുന്ന ദൃശ്യങ്ങള് പുറത്തുവന്നിരുന്നു. തുടര്ന്നാണ് സംഭവത്തില് കോടതി ഇടപ്പെട്ടത്.
