തൃശൂര്: കുന്നംകുളം ബസ് സ്റ്റാന്റില് നിന്ന് മോഷണം പോയ ബസ് കണ്ടെത്തി. സംഭവത്തില് ബസിന്റെ പഴയ ഡ്രൈവര് ഷംനാദ് ആണ് ബസ് കടത്തിക്കൊണ്ടുപോയതെന്ന് കണ്ടെത്തി. ബസ് ഗുരുവായൂര് മേല്പ്പാലത്തിന് കീഴില് ഉപേക്ഷിച്ച നിലയിലാണ് കണ്ടെത്തിയത്. അതേസമയം, രാത്രിയില് മറ്റ് യാത്രാ മാര്ഗ്ഗങ്ങള് ഇല്ലാത്തതിനാലാണ് ബസ് എടുത്തുകൊണ്ടു പോയതെന്ന് ഡ്രൈവര് പൊലീസിന് മൊഴി നല്കി. പ്രതി മദ്യലഹരിയിലാണോ എന്ന് പരിശോധിച്ചു വരികയാണ് പൊലീസ്.
കുന്നംകുളം പുതിയ ബസ്റ്റാന്ഡില് നിന്നാണ് ബസ് മോഷണം പോയത്. കുന്നംകുളം ഗുരുവായൂര് റൂട്ടില് സര്വീസ് നടത്തുന്ന ഷോണി ബസാണ് മോഷണം പോയത്. ഇന്ന് പുലര്ച്ചെ 4.10 നാണ് ബസ് മോഷണം പോയ വിവരം ഉടമ അറിയുന്നത്. 4.13 ബസ് കുന്നംകുളം പഴയ ബസ് സ്റ്റാന്ഡിന് മുന്പിലെ സിസിടിവി ക്യാമറയിലും 4.19 ചാട്ടുകുളത്തെ സിസിടിവി ക്യാമറയിലും മോഷ്ടാവ് ബസ് ഓടിച്ചു പോകുന്നതിന്റെ ദൃശ്യങ്ങള് പതിഞ്ഞിട്ടുണ്ട്.
പുലര്ച്ചെ ബസ് ഉടമ ഷോണി പുതിയ ബസ്റ്റാന്ഡില് പാര്ക്ക് ചെയ്ത ബസ് എടുക്കാന് എത്തിയപ്പോഴാണ് ബസ് കാണാതായത്. തുടര്ന്ന് കുന്നംകുളം പൊലീസില് പരാതി നല്കി. കുന്നംകുളം സ്റ്റേഷന് ഹൗസ് ഓഫീസര് യുകെ ഷാജഹാന്റെ നേതൃത്വത്തില് മേഖലയിലെ സിസിടിവി ക്യാമറകള് ഉള്പ്പെടെ കേന്ദ്രീകരിച്ച് മോഷ്ടാവിനായി അന്വേഷണം ആരംഭിച്ചിരുന്നു. ഇതിനിടയിലാണ് പഴയ ഡ്രൈവര് തന്നെ പിടിയിലാവുന്നത്.
