ന്യൂദല്‍ഹി: ഇടതു മുന്നണി കണ്‍വീനര്‍ ഇ.പി. ജയരാജനെ വധിക്കാന്‍ ശ്രമിച്ചെന്ന കേസില്‍ കെപിസിസി അധ്യക്ഷന്‍ കെ. സുധാകരന് എംപിക്കെതിരെ സംസ്ഥാന സര്‍ക്കാര്‍ സുപ്രീംകോടതിയില്‍ .കേസില്‍ കെ. സുധാകരനെ കുറ്റവിമുക്തനാക്കിയ ഹൈക്കോടതി നടപടി റദ്ദാക്കണമെന്ന് ആവശ്യപ്പെട്ടാണ് അപ്പീല്‍ സമര്‍പ്പിച്ചത്.
സുധാകരന് ഗൂഢാലോചനയില്‍ പങ്കുണ്ടെന്നും ഇതിന് ശക്തമായ തെളിവുണ്ടെന്നും അപ്പീലില്‍ പറയുന്നു.ആന്ധ്രാപ്രദേശില്‍ രജിസ്റ്റര്‍ ചെയ്ത കേസില്‍ രണ്ട് പേരാണ് വിചാരണ നേരിട്ടത്.
ഗൂഢാലോചനയില്‍ സുധാകരന് ഉള്‍പ്പെടെയുള്ളവര്‍ക്ക് പങ്കുണ്ടെന്ന് കേരള പൊലീസ് അന്വേഷണത്തില്‍ കണ്ടെത്തിയിട്ടുണ്ട്. ഈ സാഹചര്യത്തില്‍ ഹൈക്കോടതി ഉത്തരവ് അടിയന്തരമായി റദ്ദാക്കണമെന്നാണ് ആവശ്യം. സ്റ്റാന്‍ഡിംഗ് കൗണ്‍സല്‍ ഹര്‍ഷദ് വി. ഹമീദാണ് സംസ്ഥാനത്തിനായി അപ്പീല്‍ സമര്‍പ്പിച്ചത്.
1995 ഏപ്രില്‍ 12-ന് പാര്‍ട്ടി കോണ്‍ഗ്രസ് കഴിഞ്ഞ് ചണ്ഡിഗഡില്‍ നിന്ന് ട്രെയിനില്‍ കേരളത്തിലേക്ക് മടങ്ങവെയായിരുന്നു ഇ.പി. ജയരാജനു നേരെ ആക്രമണം. വധശ്രമക്കേസില്‍ ഗൂഢാലോചനാ കുറ്റമായിരുന്നു കെ. സുധാകരനെതിരെ ചുമത്തിയിരുന്നത്. എന്നാല്‍, സുധാകരനെതിരെ തെളിവുകള്‍ ഇല്ലെന്നായിരുന്നു ഹൈക്കോടതി കണ്ടെത്തിയത്.
