വയനാട് : ഉരുള്‍ പൊട്ടലില്‍ ജീവന്‍പൊലിഞ്ഞവരുടെ മൃതദേഹങ്ങള്‍ കണ്ടെത്താന്‍ ചാലിയാര്‍ പുഴ കടന്ന് വയനാട്ടിലേക്ക് പോയ മൂന്ന് യുവാക്കള്‍ വനത്തില്‍ കുടുങ്ങിയെങ്കിലും രക്ഷപ്പെടുത്തി. മലപ്പുറം നിലമ്പൂര്‍ മുണ്ടേരി സ്വദേശികളായ റയീസ്, സാലി, കൊണ്ടോട്ടി സ്വദേശി മുഹസിന്‍ എന്നിവരാണ് കുടുങ്ങിയത്.
അതിസാഹസികമായിട്ടാണ് ഇവരെ രക്ഷിച്ചത്. ഒരാളെ കയര്‍കെട്ടി പൊലീസ് രക്ഷിച്ചപ്പോള്‍ മറ്റ് രണ്ട് പേരെ ഹെലികോപ്റ്റര്‍ ഉപയോഗിച്ച് വ്യോമസേന രക്ഷപ്പെടുത്തുകയായിരുന്നു.
വെളളിയാഴ്ചയാണ് അവര്‍ സൂചിപ്പാറ മേഖലയിലേക്ക് പോയത്. ഇവിടെ അപകടസാധ്യതയുള്ള സ്ഥലമാണ്. ഇവര്‍ കുടുങ്ങിയത് ശക്തമായ കുത്തൊഴുക്ക് ഉള്ള ഇടത്താണ്.
വനത്തിനുളളില്‍ അപകടഭീഷണിയുളളതിനാല്‍ പോകരുതെന്ന് പൊലീസ് മുന്നറിയിപ്പ് നല്‍കിയിട്ടും അത് കണക്കിലെടുക്കാതെ പോയതാണ് ഇവര്‍.ഒരാള്‍ക്ക് പരിക്കുണ്ട്. പ്രാഥമിക ചികിത്സ നല്‍കിയ ശേഷം ഇവരെ ആശുപത്രിയിലേക്ക് മാറ്റി.
