കൊച്ചി: കേരളത്തിന്റെ മൂന്നാം വന്ദേഭാരത് എക്‌സ്പ്രസ് സർവീസ് ആരംഭിച്ചു. എറണാകുളം-ബെംഗളൂരു പാതയിലാണ് സ്‌പെഷ്യൽ വന്ദേഭാരത് എക്‌സ്പ്രസിന്റെ സർവീസ്. ഇന്ന് ഉച്ചയ്‌ക്ക് 12.50-ന് എറണാകുളം സൗത്ത് റെയിൽവേ സ്റ്റേഷനിൽ നിന്നാണ് പുതിയ സർവീസിന് തുടക്കം കുറിച്ചത്.
വയനാട് ഉരുൾപൊട്ടൽ ദുരന്തത്തിന്റെ പശ്ചാത്തലത്തിൽ ദുഃഖാചരണത്തിന്റെ ഭാഗമായി ഔദ്യോഗിക ചടങ്ങുകൾ ഒന്നും ഇല്ലാതെയാണ് വന്ദേഭാരത് സർവീസ് ആരംഭിച്ചത്. ആഴ്ചയിൽ മൂന്ന് ദിവസമാണ് എറണാകുളം-ബെംഗളൂരു വന്ദേഭാരത് സർവീസ് നടത്തുക. ബുധൻ, വെള്ളി, ഞായർ എന്നീ ദിവസങ്ങളിൽ ഉച്ചയ്‌ക്ക് 12.50-ന് എറണാകുളത്ത് നിന്ന് പുറപ്പെടുന്ന ട്രെയിൻ രാത്രി 10-മണിയോടെ ബെംഗളൂരു കന്റോൺമെന്റിലെത്തും.
