കോട്ടയം: തെരഞ്ഞെടുപ്പ് തോല്‍വിക്കു കാരണക്കാര്‍ ഉദ്യോഗസ്ഥരെന്നു വരുത്തിത്തീര്‍ക്കാന്‍ കേരള കോണ്‍ഗ്രസ് ജോസ് കെ മാണി വിഭാഗത്തിന്‌റെ ശ്രമം. സര്‍ക്കാര്‍ തീരുമാനങ്ങള്‍ നടപ്പാക്കുന്നതില്‍ അനാവശ്യ കാലതാമസം വരുത്തുന്ന ഉദ്യോഗസ്ഥരെ നിലയ്ക്ക് നിറുത്താന്‍ മന്ത്രിമാര്‍ക്ക് കഴിയുന്നില്ലെന്ന് കേരള കോണ്‍ഗ്രസ് ജില്ലാ നേതൃത്വ യോഗം വിലയിരുത്തി. ഭരണതലത്തില്‍ സ്വീകരിക്കേണ്ട തിരുത്തല്‍ നടപടികള്‍ ചര്‍ച്ച ചെയ്യാന്‍ ചേര്‍ന്ന യോഗത്തിലാണ് ഈ അഭിപ്രായം ഉയര്‍ന്നുവന്നത്. വേണ്ടത്ര ജാഗ്രത പുലര്‍ത്തണമെന്നും യോഗം നിര്‍ദ്ദേശിച്ചു. സര്‍ക്കാര്‍ ജനങ്ങള്‍ക്കായി എല്ലാം ചെയ്യുന്നുണ്ടെന്നും എന്നാല്‍ അത് ഉദ്യോഗസ്ഥരുടെ വീഴ്ച മൂലം ജനങ്ങളില്‍ എത്താഞ്ഞതാണ് തോല്‍വിക്കു കാരണമെന്നുമാണ് പാര്‍ട്ടിയുടെ നിലപാട്. എന്നാല്‍ ഉദേ്യാഗസ്ഥ്‌രെ നിലയ്‌ക്കു നിര്‍ത്താന്‍ കഴിയാത്ത മന്ത്രിമാരുടെ കൂട്ടത്തില്‍ സ്വന്തം നോമിനിയായ റോഷി അഗസ്റ്റിയനുമുണ്ടെന്ന് പാര്‍ട്ടി പറയാതെ പറയുകയാണ് ചെയ്തത്.
