ഒളിമ്പിക്സ് പോലുള്ള ലോകകായിക മാമാങ്കങ്ങളില് സ്വന്തം രാജ്യത്തിനായി മത്സരിക്കുകയെന്നത് കായിക താരങ്ങള്ക്ക് സ്വപ്നസാഫല്യമാണ്. കപ്പിനും ചുണ്ടിനുമിടയിൽ സ്വർണ്ണം നഷ്ടപ്പെട്ട താരമായി അറുപതിന്റെ നിറവില് നില്ക്കുന്ന പി ടി ഉഷയും കേരളത്തിന്റെ ഒളിമ്പിക്സ് ഓര്മകളില് നിറംമങ്ങാതെയുണ്ട്.ഒളിമ്പിക്സ് മലയാളിയുടെ മനസ്സില് പതിപ്പിച്ചതില് ആദ്യ സ്ഥാനം പയ്യോളി എക്സ്പ്രസ്സിനാണ്.
നമ്മുടെ സ്വപ്നങ്ങളേക്കാള് വേഗത്തില് ഓടിയ പി ടി ഉഷയ്ക്കു 1984 ലോസ് ആഞ്ചലസ് ഒളിമ്പിക്സിലെ 400 മീറ്റര് ഹര്ഡില്സില് വെങ്കല മെഡല് നഷ്ടമായത് സെക്കന്റിന്റെ നൂറിലൊരംശത്തിനാണ്.ഒളിമ്പിക്സിന്റെ അത്ലെറ്റിക് ഇനങ്ങളുടെ ഫൈനലില് ഇടം നേടിയ ഏക ഇന്ത്യന് വനിത പി ടി ഉഷയാണെന്നതും മലയാളിക്ക് അഭിമാനമാകുന്നു. സെമിഫൈനലില് ഇടം നേടാനായ മലയാളി താരങ്ങള് ഷൈനി വില്സണും കെ എം ബീനാമോളുമാണ്.
ഉഷ 1980,1984,1988,1996 എന്നീ വര്ഷങ്ങളില് ഇന്ത്യയുടെ ഒളിമ്പിക്സ് സ്വപ്നങ്ങളില് പ്രധാനിയായിരുന്നു. ഷൈനിയെന്ന മധ്യദൂര ഓട്ടക്കാരിയും ഇന്ത്യക്കായി ഒളിമ്പിക്സില് ഓടിയ മലയാളി താരങ്ങളില് പ്രമുഖയാണ്. 1984 മുതല് 1996 വരെയുള്ള എല്ലാ ഒളിമ്പിക്സിലും ഷൈനി ഇന്ത്യക്കായി മത്സരിച്ചു. ഏറ്റവുമധികം തവണ ഒളിമ്പിക്സില് പങ്കെടുത്ത മലയാളിയെന്ന ബഹുമതി പി ടി ഉഷയ്ക്കു ഷൈനി വില്സണും അവകാശപ്പെട്ടതാണ്. ഇരുവരും നാല് ഒളിമ്പിക്സുകളില് ഇന്ത്യക്ക് വേണ്ടി മത്സരിച്ചു.
ഇന്ത്യയുടെ ഇതിഹാസ ഹോക്കി താരമായി വളര്ന്ന പി ആര് ശ്രീജേഷിന്റെയും നാലാമത്തെ ഒളിമ്പിക്സാണ് പാരീസിലേത്.2000ലെ ഒളിമ്പിക്സിന്റെ 400 മീറ്റര് സെമിഫൈനലില് ബീനാമോള് മത്സരിച്ചു. തുടര്ച്ചയായി മൂന്ന് ഒളിമ്പിക്സില് ഇന്ത്യക്ക് വേണ്ടി മത്സരിക്കാന് ബീനാമോളിനായി. 2004 ഏതന്സ് ഒളിമ്പിക്സില് മലയാളിയായ കെ എം ബിനു 400 മീറ്ററില് ദേശീയ റെക്കോര്ഡും സ്ഥാപിച്ചു.
1960 ഒളിമ്പിക്സില് മില്ഖാ സിംഗ് സ്ഥാപിച്ച 45.73 സെക്കന്ഡിന്റെ റെക്കോര്ഡാണ് ബിനു തിരുത്തിയത്. ബിനു 2004ല് 400 മീറ്റര് ഓടിയെത്തിയത് 45.48 സെക്കന്ഡിലാണ്.കൂടുതല് കേരളീയര് പങ്കെടുത്തത് 2016ലാണ് 11 മലയാളികളാണ് ഇന്ത്യക്ക് വേണ്ടി മത്സരിച്ചത്. 2020 ഒളിമ്പിക്സില് ഒമ്പത് മലയാളികളും. പാരീസില് 2024 ഒളിമ്പിക്സ് തുടങ്ങാനിരിക്കുമ്പോള് മലയാളികളും പ്രതീക്ഷകളിലാണ്.
