കോഴിക്കോട് : ഇന്‍സ്റ്റഗ്രാം വഴി അശ്ലീല സന്ദേശങ്ങള്‍ അയച്ചത് ചോദ്യം ചെയ്ത യുവതിയെ ക്രൂരമായി മര്‍ദ്ദിച്ചെന്ന പരാതിയില്‍ കൊടുവള്ളി പൊലീസ് കേസെടുത്തതോടെ യുവാവ് ഒളിവില്‍ പോയി. കണ്ണിന് ഗുരുതര പരിക്കേറ്റ യുവതി ചികിത്സ തേടി. ഓമശേരി നടമ്മല്‍ പൊയിലിലാണ് സംഭവം.
യുവതിയുടെ നാട്ടുകാരനായ ചെറുവോട്ട് മിര്‍ഷാദാണ് പ്രതി. ഇന്‍സ്റ്റാഗ്രാം ഐഡിയിലേക്ക് നിരന്തരം യുവാവ് അശ്ലീല സന്ദേശം അയക്കുകയായിരുന്നു. ഇതിന് ഇന്‍സ്റ്റാഗ്രാം വഴി യുവതി മറുപടി നല്‍കിയിട്ടും ആവര്‍ത്തിച്ചപ്പോള്‍ യുവാവിന്റെ വീട്ടില്‍ പോയി പരാതി പറഞ്ഞു.
ഈ വൈരാഗ്യത്തില്‍ മിര്‍ഷാദ് വഴിയില്‍ തടഞ്ഞുവച്ച് ആക്രമിച്ചെന്നാണ് യുവതി പരാതി നല്‍കിയത്. വിവാഹ നിശ്ചയ സമയത്ത് ലഭിച്ച സ്വര്‍ണവും നഷ്ടപ്പെട്ടെന്ന് യുവതി പറയുന്നു. കേസെടുത്തതോടെ മിര്‍ഷാദിന്റെ ഫോണ്‍ സ്വിച്ച് ഓഫ് ആയി.ഇയാള്‍ ഒളിവില്‍ പോയെന്ന് കൊടുവള്ളി പൊലീസ് അറിയിച്ചു.
