കണ്ണൂര് : സിപിഎം വിട്ട യുവ നേതാവ് മനു തോമസിന്റെ വെളിപ്പെടുത്തലിനെ തുടര്ന്ന് വക്കീല് നോട്ടീസ് അയച്ച് പി ജയരാജന്റെ മകന് ജെയ്ന് രാജ്.പി ജയരാജനും തനിക്കുമെതിരെ മനു തോമസ് അപകീര്ത്തികരമായ പരാമര്ശങ്ങള് നടത്തിയെന്ന് ചൂണ്ടിക്കാട്ടിയാണ് ജെയ്ന് രാജ് വക്കീല് നോട്ടീസ് അയച്ചത്. 50 ലക്ഷം രൂപ നഷ്ടപരിഹാരം വേണമെന്നാണ് ആവശ്യം.
അപകീര്ത്തി പരാമര്ശത്തില് മനു തോമസിനെതിര നിയമനടപടി സ്വീകരിക്കുമെന്ന് പി ജയരാജന്റെ മകന് ജെയ്ന് രാജ് ഇന്നലെ ഫേസ്ബുക്കിലൂടെ അറിയിച്ചിരുന്നു. പിതാവിനോടുള്ള വൈരാഗ്യം മൂലം തന്നെ അപകീര്ത്തിപ്പെടുത്തിയെന്നാണ് ജെയ്ന്രാജ് പറയുന്നത്.
അതിനിടെ കണ്ണൂരിലെ സിപിഎം നേതൃത്വത്തിനെതിരെ ഗുരുതര വെളിപ്പെടുത്തലുകള് നടത്തിയതിന് പിന്നാലെ ഭീഷണി സന്ദേശങ്ങള് എത്തിയ പശ്ചാത്തലത്തില് മനുതോമസിന് പൊലീസ് സംരക്ഷണം ഏര്പ്പെടുത്തി. വീടിനും മനുവിന്റെ ഉടമസ്ഥതിയിലുള്ള സ്ഥാപനങ്ങള്ക്കും പൊലീസ് സംരക്ഷണം നല്കും. രഹസ്യാന്വേഷണ റിപ്പോര്ട്ടിന്റെ അടിസ്ഥാനത്തിലാണ് ജില്ലാ പൊലീസ് മേധാവി മനു തോമസിന് സുരക്ഷ ഏര്പ്പെടുത്താന് നിര്ദ്ദേശം നല്കിയത്.
