തിരുവനന്തപുരം: ഇന്‍സ്റ്റഗ്രാം ഇന്‍ഫ്‌ലുവന്‍സറായ പ്ലസ്ടു വിദ്യാര്‍ഥിനിയുടെ ആത്മഹത്യ കേസിലെ പ്രതി നെടുമങ്ങാട് ഉഴമലയ്‌ക്കല്‍ സ്വദേശിയായ ബിനോയിയെ വീണ്ടും കസ്റ്റഡിയില്‍ വേണമെന്ന് ആവശ്യപ്പെട്ട് അന്വേഷണ സംഘം. പ്രതിയെ ബുധനാഴ്ച കോടതിയില്‍ ഹാജരാക്കാന്‍ ജയില്‍ മേധാവിക്ക് നിര്‍ദ്ദേശം. തിരുവനന്തപുരം പോക്‌സോ കോടതിയുടേതാണ് ഉത്തരവ്.
പ്രതിയെ മൂന്ന് ദിവസത്തെ കസ്റ്റഡിയില്‍ വേണമെന്നാവശ്യപ്പെട്ട് അന്വേഷണ സംഘം നേരത്തെ കോടതിയെ സമീപിച്ചിരുന്നു. എന്നാല്‍ കോടതി അന്വേഷണ സംഘത്തിന്റെ ആവശ്യം നിരസിക്കുകയായിരുന്നു. കേസുമായി ബന്ധപ്പെട്ട കൂടുതല്‍ അന്വേഷണത്തിനായി പ്രതിയെ വീണ്ടും കസ്റ്റഡിയില്‍ വേണമെന്നാണ് അന്വേഷണം സംഘത്തിന്റെ ആവശ്യം. പ്രതി ജാമ്യാപേക്ഷ സമര്‍പ്പിച്ച സമയത്താണ് സര്‍ക്കാര്‍ അഭിഭാഷകന്‍ പ്രതിയെ വീണ്ടും കസ്റ്റഡിയില്‍ വേണമെന്ന ആവശ്യപ്പെട്ടത്.
പെണ്‍കുട്ടിയെ പലതവണ പ്രതി ലൈംഗിക ചൂഷണത്തിന് ഇരയാക്കിയിരുന്നുവെന്നും പൊലീസ് കോടതിയെ അറിയിച്ചു. ഇന്‍സ്റ്റഗ്രാം വഴി പരിചയപ്പെട്ട ഇവര്‍ രണ്ടു വര്‍ഷത്തോളം റീല്‍സ് ചെയ്തിരുന്നു. പ്രതിയുമായി അടുപ്പമുണ്ടായിരുന്നപ്പോള്‍ പെണ്‍കുട്ടിക്ക് പ്രായപൂര്‍ത്തി ആയില്ല എന്നതിനാലാണ് പോക്‌സോ കേസ് റജിസ്റ്റര്‍ ചെയ്തത്.
പ്രതി അതിജീവതയെ കൊണ്ടുപോയ റിസോര്‍ട്ട്, വാഹനം എന്നിവയുമായി ബന്ധപ്പെട്ട് അന്വേഷണം നടത്താനാണ് വീണ്ടും കസ്റ്റഡിയില്‍ വേണമെന്ന് പൊലീസ് ആവശ്യപ്പെട്ടത്.
