ഇടുക്കി: അടിമാലി ശല്യംപാറയില്‍ സിപിഎം ബ്രാഞ്ച് സെക്രട്ടറി അയല്‍വാസിയെ വെട്ടിപ്പരിക്കേല്‍പ്പിച്ചു. ശല്യംപാറ സ്വദേശി മൊയ്തീന്‍കുഞ്ഞുവിനെയാണ് അതിര്‍ത്തി തര്‍ക്കത്തെ തുടര്‍ന്ന് സിപിഎം ബ്രാഞ്ച് സെക്രട്ടറി കെ പി ഹനീഫ വെട്ടുകത്തിയുപയോഗിച്ച് ആക്രമിച്ചത്.
കൈയ്യില്‍ ഗുരുതര പരിക്കേറ്റ മൊയ്തീന്‍കുഞ്ഞുവിനെ കോട്ടയം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. വെള്ളത്തൂവല്‍ പൊലീസ് അന്വേഷണം തുടങ്ങി.
വെള്ളത്തൂവല്‍ ശല്യംപാറയിലെ തടിപ്പണിക്കാരനായ മൊയ്തീന്‍ കുഞ്ഞ് വീട്ടുമുറ്റത്ത് കുട്ടികളുമായി ഇരിക്കവെയാണ് അപ്രതീക്ഷിതമായി ഹനീഫ ആക്രമിച്ചത്. കഴുത്തിന് വെട്ടാനുള്ള ശ്രമം തടുക്കവെ കൈക്ക് ഗുരുതര പരിക്കേറ്റു. തുടര്‍ന്നും ആക്രമിക്കാനുളള നീക്കം അയല്‍വാസികള്‍ ഓടിക്കൂടിയതിനാല്‍ വിഫലമായി. ഇടതുകയ്യിലെ അസ്ഥിയുള്‍പ്പെടെ മുറിഞ്ഞുപോതിനാല്‍ മൊയ്തീന്‍ കുഞ്ഞിനെ അടിമാലി താലൂക്ക് ആശുപത്രിയില്‍ നിന്ന് കോട്ടയം മെഡിക്കല്‍ കോളേജ് ആശുപത്രിയിലേക്ക് മാറ്റി.
അതേസമയം സംഭവത്തില്‍ രാഷ്‌ട്രീയ സ്വാധീനത്താല്‍ അറസ്റ്റ് വൈകുകയാണെന്നാണ് ആരോപണം.ഇരുവരും തമ്മില്‍ ഭൂമിയുടെ അതിര്‍ത്തി തര്‍ക്കമുണ്ടായിരുന്നു. ഇതെച്ചൊല്ലി ശനിയാഴ്ച രാവിലെ മൊയ്തീന്‍ ഹനീഫയുടെ കുടുംബാംഗങ്ങളുമായി തര്‍ക്കത്തിലേര്‍പ്പെട്ടെന്നും കയ്യേറ്റ ശ്രമമുണ്ടായെന്നും പരാതിയുണ്ട്. ഇതിന്മേലുളള പ്രകോപനമാണ് ആക്രമണ കാരണമെന്ന് പൊലീസ് പറഞ്ഞു. ഇരുകൂട്ടരുടെയും വിശദമായ മൊഴിയെടുത്തശേഷം കേസെടുക്കും.
