ജമ്മു: ഉധംപൂർ, ജമ്മു മേഖലകളിലെ സുരക്ഷാ സാഹചര്യവും മേഖലയിലെ സുരക്ഷാ സേനയുടെ പ്രവർത്തന തയ്യാറെടുപ്പും ചീഫ് ഓഫ് ഡിഫൻസ് സ്റ്റാഫ് അനിൽ ചൗഹാൻ തിങ്കളാഴ്ച അവലോകനം ചെയ്തു. വടക്കൻ കമാൻഡിലെ പ്രവർത്തനങ്ങളിലെ പ്രൊഫഷണലിസത്തിനും ഏകീകരണത്തിനും സൈന്യത്തെയും വ്യോമസേനയെയും അദ്ദേഹം അഭിനന്ദിച്ചു.
ജമ്മു കശ്മീരിലെ വാർഷിക അമർനാഥ് തീർഥാടനത്തിനായുള്ള സുരക്ഷാ സാഹചര്യങ്ങളും ഒരുക്കങ്ങളും അവലോകനം ചെയ്യുന്നതിനായി കേന്ദ്ര ആഭ്യന്തര മന്ത്രി അമിത് ഷാ ദൽഹിയിൽ ഉന്നതതല യോഗം ചേർന്നതിന് തൊട്ടുപിന്നാലെയായിരുന്നു അദ്ദേഹത്തിന്റെ സന്ദർശനം.
നഗ്രോട്ടയിലെ 16 കോർപ്സ് ആസ്ഥാനത്തും പിന്നീട് ഉദംപൂരിലെ നോർത്തേൺ കമാൻഡിലും എത്തിയ ജനറൽ ചൗഹാൻ, മേഖലയിലെ സുരക്ഷാ സാഹചര്യവും സുരക്ഷാ സേനയുടെ പ്രവർത്തന തയ്യാറെടുപ്പും അവലോകനം ചെയ്തുവെന്ന് ഉദ്യോഗസ്ഥർ പറഞ്ഞു.
നോർത്തേൺ ആർമി കമാൻഡറും ജനറൽ ഓഫീസർ കമാൻഡിംഗും (ജിഒസി) ഉൾപ്പെടെയുള്ള ഉന്നത സൈനിക കമാൻഡർമാർ അദ്ദേഹത്തെ വിവരമറിയിച്ചു. ജനറൽ അനിൽ ചൗഹാൻ നോർത്തേൺ കമാൻഡിന്റെയും ഉധംപൂരിലെയും ജമ്മുവിലെ വൈറ്റ് നൈറ്റ് കോർപ്സിന്റെയും ആസ്ഥാനം സന്ദർശിച്ചതായി ഹെഡ്ക്വാർട്ടേഴ്സ് ഇൻ്റഗ്രേറ്റഡ് ഡിഫൻസ് സ്റ്റാഫ് എക്സിൽ അറിയിച്ചു.
ട്രൈ-സർവീസസ് സിനർജി നേടിയെടുക്കുന്ന വിഷയത്തിൽ ഉദ്യോഗസ്ഥരെ അഭിസംബോധന ചെയ്ത സിഡിഎസ്, ഇന്ത്യൻ സൈന്യത്തിന്റെയും ഇന്ത്യൻ വ്യോമസേനയുടെയും എല്ലാ റാങ്കുകാരെയും അവരുടെ പ്രൊഫഷണലിസത്തിനും നോർത്തേൺ കമാൻഡിലെ പ്രവർത്തനങ്ങളിലെ കൂട്ടുകെട്ടിനും അഭിനന്ദിച്ചു.
ജമ്മു മേഖലയിൽ അടുത്തിടെയുണ്ടായ ഭീകരാക്രമണങ്ങളെ ശക്തമായി നേരിടാനുള്ള തന്ത്രങ്ങൾ കൂടുതൽ രൂപപ്പെടുത്തുന്നതിന് ആഭ്യന്തര മന്ത്രിയും ലഫ്റ്റനൻ്റ് ഗവർണറും ഉൾപ്പെടെ വിവിധ തലങ്ങളിൽ സുരക്ഷാ അവലോകന യോഗങ്ങളുടെ ഒരു പരമ്പര തന്നെ കഴിഞ്ഞ ദിവസങ്ങളിൽ നടന്നിരുന്നു.
റിയാസി, കത്വ, ദോഡ ജില്ലകളിൽ കഴിഞ്ഞയാഴ്ച നടന്ന നാല് ഭീകരാക്രമണങ്ങളിൽ ഒരു സിആർപിഎഫും രണ്ട് ഭീകരരും ഉൾപ്പെടെ 10 പേർ കൊല്ലപ്പെടുകയും 50 പേർക്ക് പരിക്കേൽക്കുകയും ചെയ്തിരുന്നു.
