കല്‍പ്പറ്റ: ക്രൂരമായ മര്‍ദനത്തിനും മാനസിക പീഡനത്തിനും ഇരയായതിനെത്തുടര്‍ന്ന് പൂക്കോട് വെറ്ററിനറി കോളജ് രണ്ടാം വര്‍ഷ ബിരുദ വിദ്യാര്‍ത്ഥി സിദ്ധാര്‍ത്ഥനെ ഹോസ്റ്റലിലെ ശുചിമുറിയില്‍ തൂങ്ങിമരിച്ച നിലയില്‍ കണ്ടെത്തിയ സംഭവത്തില്‍ ജസ്റ്റിസ് എ. ഹരിപ്രസാദ് കമ്മിഷന്‍ സിറ്റിങ് 29ന് തുടങ്ങും. എറണാകുളം തൃക്കാക്കരയില്‍ കൊച്ചി ശാസ്ത്ര സാങ്കേതിക സര്‍വകലാശാലയുടെ വിസിറ്റിങ് ഫാക്കല്‍റ്റി ഗസ്റ്റ് ഹൗസില്‍ പ്രവര്‍ത്തിക്കുന്ന കമ്മിഷന്‍ ഓഫീസിലാണ് രാവിലെ 10 മുതല്‍ സിറ്റിങ്.
സിദ്ധാര്‍ത്ഥന്റെ അസ്വാഭാവിക മരണത്തില്‍ കോളജ് അധികൃതരുടെയും മറ്റും വീഴ്‌ച്ച അന്വേഷിക്കുന്നതിന് കേരള വെറ്ററിനറി ആന്‍ഡ് അനിമല്‍ സയന്‍സസ് സര്‍വകലാശാല നിയമപ്രകാരം ഗവര്‍ണര്‍ നിയോഗിച്ചതാണ് കമ്മിഷന്‍. കേരള ഹൈക്കോടതി റിട്ട. ജസ്റ്റിസാണ് എ. ഹരിപ്രസാദ്. ഹാജരാകുന്നതിന് സര്‍വകലാശാല വൈസ് ചാന്‍സലര്‍, കോളജ് ഡീന്‍, അസിസ്റ്റന്റ് വാര്‍ഡന്‍ തുടങ്ങിയവര്‍ക്ക് കമ്മിഷന്‍ നോട്ടീസ് അയച്ചിട്ടുണ്ട്. താത്പര്യമുള്ളവര്‍ക്ക് സിദ്ധാര്‍ത്ഥന്റെ മരണവുമായി ബന്ധപ്പെട്ട വിവരങ്ങള്‍, വെളിപ്പെടുത്തലുകള്‍, മൊഴികള്‍, തെളിവുകള്‍ എന്നിവ ഓഫീസില്‍ നേരിട്ടും തപാല്‍, ഇ മെയില്‍ (ഷമവശിൂൗശൃ്യ.സ്മൗെ@ഴാമശഹ.രീാ), ഫോണ്‍ (8848314328) മുഖേനയും ലഭ്യമാക്കുന്നതിന് കമ്മിഷന്‍ സൗകര്യം ഒരുക്കിയിട്ടുണ്ട്.
ഫെബ്രുവരി 18നാണ് ഹോസ്റ്റലിലെ കുളിമുറിയില്‍ തൂങ്ങിമരിച്ച നിലയില്‍ സിദ്ധാര്‍ത്ഥനെ കണ്ടെത്തിയത്. എസ്എഫ്‌ഐക്കാരുടെ മര്‍ദനവും മാനസിക പീഡനവുമാണ് സിദ്ധാര്‍ത്ഥനെ മരണത്തിലേക്ക് നയിച്ചതെന്ന് പ്രാഥമിക അന്വേഷണത്തില്‍ തെളിഞ്ഞിരുന്നു. ഫെബ്രുവരി 26, 27, 28, മാര്‍ച്ച് ഒന്ന് തീയതികളില്‍ യുജിസി ആന്റി റാഗിങ് സ്‌ക്വാഡ് വിദ്യാര്‍ത്ഥികള്‍, അദ്ധ്യാപകര്‍, സ്റ്റാഫ് എന്നിവരുടെ മൊഴിയെടുത്തിരുന്നു. 97 പേരാണ് സ്‌ക്വാഡ് മുമ്പാകെ ഹാജരായത്. കേസില്‍ 20 വിദ്യാര്‍ത്ഥികളെ പോലീസ് അറസ്റ്റുചെയ്തിരുന്നു. ഇവര്‍ റിമാന്‍ഡിലാണ്. കേസ് നിലവില്‍ അന്വേഷിക്കുന്ന സിബിഐ പ്രാഥമിക കുറ്റപത്രം സമര്‍പ്പിച്ചിട്ടുണ്ട്.
