തിരുവനന്തപുരം: കരുനാഗപ്പള്ളിയില് നടന്ന അപകടമരണങ്ങളുടെ പശ്ചാത്തലത്തില് രണ്ട് ഡ്രൈവര്മാര്ക്കെതിരെ നടപടി സ്വീകരിച്ച് കെഎസ്ആര്ടിസി. പാപ്പനംകോട് യൂണിറ്റിലെ ഡ്രൈവര് എ.ടി പ്രബാഷ്, പൂവാര് യൂണിറ്റിലെ ഡ്രൈവറായ ഷൈന് എന്നിവര്ക്കെതിരെയാണ് നടപടി. പ്രബാഷിനെ സസ്പെന്ഡ് ചെയ്യുകയും ഷൈനിനെ സര്വീസില് നിന്ന് പിരിച്ചുവിട്ടെന്നും കെഎസ്ആര്ടിസി അറിയിച്ചു.
കെഎസ്ആര്ടിസി അറിയിപ്പ്
തിരുവനന്തപുരത്തുനിന്നും കോഴിക്കോട് സർവീസ് നടത്തുകയായിരുന്ന JN 357 എ സി ബസ് 15.05.2024ന് ഉച്ചയ്ക്ക് 01.00 മണിയോടുകൂടി കരുനാഗപ്പള്ളി ലാലാജി ജംഗ്ഷനിൽ വച്ച് അപകടത്തിൽപ്പെടുകയായിരുന്നു. മുന്നിൽ പോവുകയായിരുന്ന ലോറി പെട്ടെന്ന് ബ്രേക്ക് ചെയ്യുകയും ലോറിക്ക് പുറകിലായി പോവുകയായിരുന്ന സ്കൂട്ടർ ലോറിയിൽ ഇടിക്കുകയും സ്കൂട്ടറിന് പുറകിൽ പോവുകയായിരുന്ന കെഎസ്ആർടിസി ബസ് സ്കൂട്ടറിൽ ഇടിക്കുകയും സ്കൂട്ടർ യാത്രക്കാരിക്ക് ഗുരുതരമായി പരിക്കേൽക്കുകയും മരണപ്പെടുകയുമായിരുന്നു.
റോഡ് നിയമങ്ങൾ പാലിച്ച് കൃത്യമായ അകലം പാലിക്കാതെ ബസ് ഓടിച്ചതാണ് യാത്രക്കാരിയുടെ ദാരുണാന്ത്യത്തിന് ഇടയാക്കിയതെന്നാണ് പ്രഥമിക കണ്ടെത്തൽ.ഇത് കെഎസ്ആർടിസി ഡ്രൈവറുടെ ഭാഗത്തുനിന്നുണ്ടായ കൃത്യനിർവഹണത്തിലെ ഗുരുതരമായ വീഴ്ചയും ചട്ടലംഘനവുമാണ് .
പൂവാർ യൂണിറ്റിലെ RSC 519 ബസ് 17.05.2024 ന് കായംകുളത്തു നിന്നും തിരുവനന്തപുരത്തേക്ക് സർവീസ് നടത്തവെ ,രാവിലെ 10.20 മണിയോടെ കരുനാഗപ്പള്ളി ഡിപ്പോയിലേക്ക് ബസ് പ്രവേശിക്കുമ്പോൾ 75 വയസ്സ് പ്രായമുള്ള ചന്ദ്രബാൽ എന്ന വയോധികൻ ബസിന്റെ ഇടത് വശത്തെ മുൻപിലത്തെ ടയറിന് അടിയിൽപ്പെടുകയും കരുനാഗപ്പള്ളി താലൂക്ക് ആശുപത്രിയിൽ പ്രവേശിപ്പിച്ചെങ്കിലും മരണപ്പെടുകയും ചെയ്തു.
അപകടവുമായി ബന്ധപ്പെട്ട് കെഎസ്ആർടിസി വിജിലൻസ് വിഭാഗം നടത്തിയ പ്രാഥമിക
അന്വേഷണത്തിൽ JN357 ഏ.സി ബസ് ഓടിച്ചിരുന്ന പാപ്പനംകോട് യൂണിറ്റിലെ ഡ്രൈവർ എ.റ്റി പ്രബാഷും പൂവാർ യൂണിറ്റിലെ RSC 519 ബസിലെ ഡ്രൈവറായ ഷൈൻ. ടി യും കുറ്റക്കാരാണെന്ന് കണ്ടെത്തുകയും എ.റ്റി പ്രബാഷിനെ അന്വേഷണ വിധേയമായി സർവീസിൽ നിന്നും സസ്പെൻഡ് ചെയ്യുകയും പൂവാർ യൂണിറ്റിലെ ഡ്രൈവറായ ഷൈൻ. ടി യെ സർവീസിൽ നിന്നും പിരിച്ചുവിടുകയും ചെയ്തിട്ടുണ്ട്.
കെഎസ്ആർടിസി ബസ്സുകൾ ഉൾപ്പെടുന്ന അപകടങ്ങൾ കുറയ്ക്കുന്നതിലേക്കായി
ഗതാഗത വകുപ്പു മന്ത്രിയുടെ നിർദ്ദേശപ്രകാരം കെഎസ്ആർടിസി ചെയർമാൻ & മാനേജിംഗ് ഡയറക്ടറുടെ നേതൃത്വത്തിൽ സ്റ്റേറ്റ് ലെവൽ ആക്സിഡൻറ് മോണിറ്ററിങ്ങ് കമ്മിറ്റി രൂപീകരിച്ച് പ്രവർത്തിച്ചു വരുകയാണ്. ആക്സിഡൻറ് മോണിറ്ററിങ്ങ് കമ്മിറ്റിയുടെ നിർദ്ദേശത്തിന്റെ അടിസ്ഥാനത്തിൽത്തിൽ ഇനിയും ഇത്തരത്തിൽ കെഎസ്ആർടിസി ജീവനക്കാരുടെഭാഗത്തുനിന്നുണ്ടാകുന്ന വീഴ്ചകൊണ്ടോ, അശ്രദ്ധ കൊണ്ടോ അപകടം സംഭവിക്കുകയാണെങ്കിൽ കുറ്റക്കാർക്കെതിരെ അതിശക്തമായ നടപടി സ്വീകരിക്കുന്നതാണ്.
