കോട്ടയം: സ്വകാര്യ ഫിനാന്സ് കമ്പനിയില് നിന്ന് വായ്പ വാങ്ങി നല്കാമെന്ന് പറഞ്ഞ് പണം തട്ടിയ കേസില് കോഴിക്കോട് പുതുപ്പാടി ആലുങ്കല് അനിലിനെ (39) പോലീസ് അറസ്റ്റ് ചെയ്തു. മുണ്ടക്കയം പാറത്തോട് സ്വദേശിയായ യുവാവിന് 50000 രൂപ വായ്പ തരപ്പെടുത്തി നല്കാമെന്ന് പറഞ്ഞ് ഇയാളില് നിന്നും 32500 രൂപ തട്ടിയെടുക്കുകയായിരുന്നു. സ്വകാര്യ ഫിനാന്സ് കമ്പനിയുടെ ജീവനക്കാരനാണെന്നു പറഞ്ഞ് യുവാവിനെ വാട്സ്ആപ്പ് മുഖേന ബന്ധപ്പെടുകയും 50000 രൂപ ലോണ് ലഭിക്കുമെന്നും ഇതിനായി പ്രോസസിങ് ഫീസ് ഇനത്തില് പണം അടയ്ക്കണമെന്നും പറഞ്ഞ് പലതവണകളിലായി 32500 രൂപ തട്ടിയെടുക്കുകയായിരുന്നു. പിന്നീട് ലോണ് ലഭിക്കാതെ വന്നതോടെ പോലീസില് പരാതി നല്കി. ജില്ലാ പോലീസ് മേധാവി കെ.കാര്ത്തിക്കിന്റെ നേതൃത്വത്തിലുള്ള അന്വേഷണത്തിനൊടുവില് പണം ഇയാളുടെ അക്കൗണ്ടിലേക്ക് ചെന്നതായി കണ്ടെത്തുകയും അറസ്റ്റ് ചെയ്യുകയുമായിരുന്നു. കോടതിയില് ഹാജരാക്കിയ ഇയാളെ റിമാന്ഡ് ചെയ്തു .
