കൊല്ലം: ശാസ്താംകോട്ടയിൽ എസി പൊട്ടിത്തെറിച്ച് വീടിന് തീപിടിച്ചു. പേരുവഴി ഇടയ്‌ക്കാട് ഭാഗത്താണ് സംഭവം. എസി പൊട്ടിത്തെറിച്ചുണ്ടായ അപകടത്തിൽ വീട് ഭാഗികമായി കത്തി നശിച്ചു. പള്ളിപ്പറമ്പിൽ ഡെന്നി സാമിന്റെ വീട്ടിലാണ് എസി പൊട്ടിത്തെറിച്ചത്. ഈ സമയം കുടുംബം പ്രാർത്ഥനയ്‌ക്കായി പള്ളിയിൽ പോയിരുന്നതിനാൽ വൻ ദുരന്തം ഒഴിവായി.
മുറിയുടെ കതക്, ജനാലകൾ, കട്ടിൽ കിടക്ക എന്നിവ പൂർണമായും കത്തിനശിച്ചു.ഇരുനില വീട് മുഴുവൻ പുകയും കരിയും പിടിച്ച നിലയിലാണ്. ശനിയാഴ്ച രാത്രി ഒമ്പത് മണിയോടെയായിരുന്നു സംഭവം. വലിയ ശബ്ദത്തോടെയാണ് പൊട്ടിത്തെറി ഉണ്ടായതെന്നും വീട് മുഴുവൻ പുകയാൽ മൂടപ്പെട്ടിരുന്നുവെന്നും പ്രദേശവാസികൾ പറയുന്നു.
പ്രദേശവാസികൾ തീ അണയ്‌ക്കാൻ ശ്രമിച്ചെങ്കിലും പരാജയപ്പെട്ടതോടെ ശാസ്താംകോട്ടയിൽ നിന്നും അഗ്നിരക്ഷാ സേനയെത്തിയാണ് തീ നിയന്ത്രണവിധേയമാക്കിയത്. കുടുംബം പുറത്തേക്ക് പോയ സമയത്ത് എസി ഓഫ് ചെയ്യാതിരുന്നതോ തണുപ്പ് കൂടിയതോ ആകാം പൊട്ടിത്തെറിക്കാൻ കാരണമായതെന്നാണ് അഗ്നിരക്ഷാ സേനയുടെ പ്രാഥമിക നിഗമനം.
