പത്തനംതിട്ട: വനവിഭവങ്ങള് ശേഖരിക്കാന് ഭര്ത്താവിനും ബന്ധുക്കള്ക്കുമൊപ്പം ഉള്വനത്തില് പോയ യുവതി മരണപ്പെട്ടു. മൃതദേഹം പമ്പ പോലീസ് സ്റ്റേഷനിലെ ഉദ്യോഗസ്ഥര് തോളില് ചുമന്ന് പുറത്തെത്തിച്ചു. ളാഹ ആനത്തോട് കോളനിയില് പൊടിമോന്റെ ഭാര്യ ജോനമ്മ (22) ആണ് മരിച്ചത്. ഇന്നലെ രാവിലെ 10 മണിക്ക് കുഴഞ്ഞുവീഴുകയായിരുന്നു. രണ്ടാം തീയതിയാണ് പൊടിമോനും ജോനമ്മയും പൊടിമോന്റെ അമ്മയും മറ്റു ബന്ധുക്കളും കുട്ടികളും അടങ്ങിയ സംഘം ളാഹ കോളനിയില് നിന്ന് യാത്ര തിരിച്ചത്. വാസനപ്പൂവ്, കുന്തിരിക്കം തുടങ്ങിയ വിഭവങ്ങള് ശേഖരിക്കുകയായിരുന്നു ലക്ഷ്യം.
ചാലക്കയത്ത് നിന്ന് അഞ്ച് കിലോമീറ്റര് മാറി വനത്തിനുള്ളില് സംഘം തങ്ങി. ജോനമ്മ രക്തക്കുറവിന് പത്തനംതിട്ട ജനറല് ആശുപത്രിയില് നിന്നുള്ള മരുന്ന് കഴിക്കുന്നുണ്ടായിരുന്നു. എന്നാല് രണ്ട് ദിവസമായി മരുന്നില്ലാത്തതു കാരണം മുടങ്ങി. വനത്തിനുള്ളില് കഴിയവേ, ഇന്നലെ രാവിലെ വയറുവേദന ഉണ്ടാവുകയും ക്ഷീണവും തളര്ച്ചയും അനുഭവപ്പെടുകയുമായിരുന്നു. തുടര്ന്ന് ആശുപത്രിയില് പോകാന് പുറത്തേക്ക് നടക്കുമ്പോള് വെള്ളം ആവശ്യപ്പെട്ടു. വെള്ളം കുടിച്ചയുടനെ കുഴഞ്ഞുവീഴുകയായിരുന്നു.
വിവരം എസ്സി എസ്ടി പ്രൊമോട്ടറെയും പോലീസിനെയും അറിയിക്കാനായി പൊടിമോന് ചാലക്കയത്തേക്ക് തിരിച്ചെങ്കിലും, വഴിയില് കാട്ടാനകളുടെ സാമീപ്യമുണ്ടായതിനാല് മൂന്നു മണിക്കൂറോളം ഒളിച്ചുകഴിയേണ്ടിവന്നു. ആനകള് മാറിയെന്ന് ഉറപ്പാക്കിയശേഷം ചാലക്കയത്തെത്തി പ്രോമോട്ടറെ വിവരമറിയിച്ചു. വിവരമറിഞ്ഞ് പമ്പ പോലീസ്, എസ്എച്ച്ഒ ജി.എസ്. ശ്യാംജിയുടെ നേതൃത്വത്തില് വനത്തിലേക്ക് എത്തി.
തുണിയില് പൊതിഞ്ഞ ജോനമ്മയുടെ മൃതദേഹം കാട്ടുകമ്പില് തുണികെട്ടി അതിനുള്ളിലായാണ് പോലീസ് ഉദ്യോഗസ്ഥര് അഞ്ച് കിലോമീറ്റര് കാട്ടിനുള്ളിലൂടെ ചുമന്ന് പുറത്തെത്തിച്ചത്. അഞ്ച് മണിക്കൂറോളം സമയമെടുത്തു പോയിവരാന്. എസ്ഐ ജെ. രാജന്, ഗ്രേഡ് എസ്ഐ കെ.വി. സജി, എസ്സിപിഒ മാരായ സാംസണ് പീറ്റര്, നിവാസ്, സിപിഒ സുധീഷ് എന്നിവര് സംഘത്തിലുണ്ടായിരുന്നു. മൃതദേഹം പത്തനംതിട്ട ജനറല് ആശുപത്രിയില് എത്തിച്ച് ഇന്ക്വസ്റ്റ് നടപടികള് പൂര്ത്തിയാക്കി. പിന്നീട് മൃതദേഹം പോസ്റ്റ്മോര്ട്ടത്തിന് ചെങ്ങന്നൂര് ഗവ. ആശുപത്രിയിലേക്ക് കൊണ്ടുപോയി.
അസ്വാഭാവിക മരണത്തിന് കേസ് രജിസ്റ്റര് ചെയ്തു. പൊടിമോനും ജോനമ്മയും നിയമപരമായി വിവാഹിതരല്ലെങ്കിലും രണ്ടുവര്ഷമായി ഒരുമിച്ചായിരുന്നു താമസം.
