ന്യൂദൽഹി : കേന്ദ്രമന്ത്രി അമിത് ഷായുടെ വ്യാജ വീഡിയോ അപ്‌ലോഡ് ചെയ്ത് പ്രചരിപ്പിച്ച കോൺഗ്രസ് അംഗത്തെ ദൽഹി പോലീസ് വെള്ളിയാഴ്ച അറസ്റ്റ് ചെയ്തു. എക്‌സ് പ്ലാറ്റ് ഫോമിൽ ‘സ്പിരിറ്റ് ഓഫ് കോൺഗ്രസ്’ അക്കൗണ്ട് കൈകാര്യം ചെയ്യുന്ന അരുൺ റെഡ്ഡി എന്ന കോൺഗ്രസ് പ്രവർത്തകനെയാണ് പോലീസ് അറസ്റ്റ് ചെയ്തത്.
ആഭ്യന്തര മന്ത്രാലയത്തിന് കീഴിലുള്ള ഇന്ത്യൻ സൈബർ ക്രൈം കോ-ഓർഡിനേഷൻ സെൻ്റർ ഷായുടെ വീഡിയോയെക്കുറിച്ച് പരാതി നൽകിയതിനെത്തുടർന്ന് ദൽഹി പോലീസ് സ്പെഷ്യൽ സെൽ എഫ്ഐആർ രജിസ്റ്റർ ചെയ്തു.
വ്യാജ വീഡിയോ കേസുമായി ബന്ധപ്പെട്ട് തെലങ്കാന മുഖ്യമന്ത്രി രേവന്ത് റെഡ്ഡിയെ ഡൽഹി പോലീസ് മെയ് ഒന്നിന് ചോദ്യം ചെയ്യാൻ വിളിപ്പിച്ചിരുന്നു. കേസുമായി ബന്ധപ്പെട്ട് അഞ്ച് തെലങ്കാന കോൺഗ്രസ് പാർട്ടി സോഷ്യൽ മീഡിയ പ്രവർത്തകരെ അറസ്റ്റ് ചെയ്തതായി ഹൈദരാബാദ് പോലീസ് അറിയിച്ചിരുന്നു.
എന്നാൽ, ഓരോ വ്യക്തിയും 10,000 രൂപ വീതമുള്ള രണ്ട് ആൾ ജാമ്യം നൽകണമെന്നും തിങ്കൾ, വെള്ളി ദിവസങ്ങളിൽ അന്വേഷണ ഉദ്യോഗസ്ഥന് മുന്നിൽ ഹാജരാകണമെന്ന വ്യവസ്ഥയോടെയാണ് അറസ്റ്റിലായവർക്ക് ലോക്കൽ കോടതി ജാമ്യം അനുവദിച്ചു.
തെലങ്കാന കോൺഗ്രസ് പ്രദേശ് കോൺഗ്രസ് പാർട്ടി എക്‌സ് അക്കൗണ്ടിൽ അമിത് ഷായുടെ തിരഞ്ഞെടുപ്പ് പ്രചാരണത്തിലും പൊതുയോഗത്തിലും നടത്തിയ പ്രസംഗത്തിന്റെ മോർഫ് ചെയ്തതോ കെട്ടിച്ചമച്ചതോ ആയ വീഡിയോ പോസ്റ്റ് ചെയ്തതായി ആരോപിച്ച് ഏപ്രിൽ 27 ന് ഒരു സംസ്ഥാന ബിജെപി നേതാവിൽ നിന്ന് പരാതി ലഭിച്ചതായി ഹൈദരാബാദ് പോലീസ് പുറത്തിറക്കിയ പ്രസ്താവനയിൽ പറയുന്നു.
തുടർന്നാണ് കേസ് ഐടിനിയമം അനുസരിച്ച് വേഗത്തിൽ അന്വേഷണം ആരംഭിച്ചത്.
