തിരുവനന്തപുരം: വൈദ്യുതി ഉപഭോഗം കൂടിയതിനെ തുടര്‍ന്ന് ചില നിയന്ത്രണങ്ങള്‍ ഏര്‍പ്പെടുത്തി ലോഡ്‌ഷെഡ്ഡിങ് ഒഴിവാക്കാന്‍ വൈദ്യുതി ബോര്‍ഡ് തീരുമാനിച്ചു. ലോഡ്‌ഷെഡ്ഡിങ് വേണമെന്ന് ബോര്‍ഡ് ആവശ്യപ്പെട്ടിരുന്നെങ്കിലും വൈദ്യുതി ഉപഭോഗം കുറയ്‌ക്കുന്നതിനു വേണ്ട നടപടിക്രമങ്ങള്‍ വരുത്താനാണ് മന്ത്രിതലത്തില്‍ നടന്ന ചര്‍ച്ചയില്‍ തീരുമാനമായത്.
രാത്രികാലങ്ങളില്‍ പ്രവര്‍ത്തിക്കുന്ന വ്യവസായ സ്ഥാപനങ്ങളില്‍ എല്ലാ യൂണിറ്റുകളും പ്രവര്‍ത്തിക്കാതെ നിയന്ത്രണവിധേമായി പ്രവര്‍ത്തിക്കാന്‍ നിര്‍ദ്ദേശം നല്‍കും. നിര്‍മാണ പ്രവര്‍ത്തനങ്ങള്‍ക്ക് രാത്രികാലങ്ങളില്‍ നിയന്ത്രണം വരുത്തും. രാത്രിയില്‍ പ്രവര്‍ത്തിക്കുന്ന ഓഫീസുകളില്‍ ആവശ്യം വേണ്ടുന്ന ലൈറ്റുകള്‍ മാത്രമെ ഉപയോഗിക്കാവൂ. എന്നാല്‍ കൂടുതല്‍ വൈദ്യുതി ഉപയോഗിക്കുമ്പോള്‍ പലയിടങ്ങളിലും ട്രാന്‍സ്‌ഫോമര്‍ കേടുവരുന്നുണ്ട്.
അതിനാല്‍ വൈദ്യുതി വിതരണം നിലയ്‌ക്കുന്നുണ്ട്. ഇത് ഉടനെ പരിഹരിക്കാന്‍ സാധിക്കാത്തതിനാല്‍ ട്രാന്‍സ്‌ഫോര്‍മറുകള്‍ ഓഫ് ചെയ്തിടുന്നത് തുടരും. വേനല്‍ കടുത്തതോടെ ഓരോ ദിവസവും പീക്ക് ടൈമില്‍ അയ്യായിരത്തിലേറെ മെഗാവാട്ട് വൈദ്യുതിയാണ് സംസ്ഥാനത്ത് വേണ്ടി വരുന്നതെന്ന് വൈദ്യുതി മന്ത്രി കെ.കൃഷ്ണന്‍കുട്ടി പറഞ്ഞു.
