ഇംഫാല് : മണിപ്പുരില് മെയ്തെയ് വിഭാഗത്തില്പ്പെട്ട സ്ത്രീകളുടെ സംഘം സൈനിക വാഹനം തടഞ്ഞു. ബിഷ്ണുപുര് ജില്ലയിലാണ് സംഭവം.
കുമ്പി പ്രദേശത്ത് രാവിലെ പട്രോളിംഗിനിടെ പിടിച്ചെടുത്ത ആയുധങ്ങളും വെടിക്കോപ്പുകളും കൊണ്ടുപോയ സൈനിക വാഹനമാണ് തടഞ്ഞത്. രണ്ട് എസ്യുവികളിലായി കടത്തിയ ആയുധങ്ങള് മഹാര് റെജിമെന്റിലെ ഉദ്യോഗസ്ഥരാണ് പിടിച്ചെടുത്തത്. സൈനികരെ കണ്ടയുടന് രണ്ട് വാഹനങ്ങളിലുമുണ്ടായിരുന്നവര് ആയുധങ്ങള് ഉപേക്ഷിച്ച് ഓടി രക്ഷപ്പെടുകയായിരുന്നു.
ഇത് കഴിഞ്ഞ് അല്പ സമയത്തിന് ശേഷം മെയ്തെയ് സ്ത്രീകളുടെ സംഘമായ ‘മീരാ പൈബിസ്’ അംഗങ്ങള് സ്ഥലത്ത് തടിച്ചുകൂടി ആയുധങ്ങള് കൈമാറണമെന്ന് ആവശ്യപ്പെട്ടു. നൂറുകണക്കിന് സ്ത്രീകളാണ് റോഡ് ഉപരോധിച്ചത്. കലാപം തീരും വരെ ആയുധങ്ങള് കണ്ടുകെട്ടരുതെന്ന് പ്രതിഷേധക്കാര് ആവശ്യപ്പെട്ടു. സൈന്യം ആകാശത്തേയ്ക്കു നിറയൊഴിച്ചെങ്കിലും പിരിഞ്ഞുപോകാന് പ്രതിഷേധക്കാര് തയാറായില്ല.
പിന്നീട് പൊലീസ് സ്ഥലത്തെത്തി ചര്ച്ചയ്ക്കൊടുവില് ആയുധങ്ങള് പൊലീസിനു കൈമാറാന് ധാരണയായി. സ്ഥിതിഗതികള് സാധാരണ നിലയിലായെന്നും സൈനികര് സംഭവസ്ഥലത്തുനിന്നു പിന്വാങ്ങിയതായും അധികൃതര് അറിയിച്ചു. പ്രതിഷേധക്കാരില് ചിലരെ കസ്റ്റഡിയിലെടുത്തു.
