കൊച്ചി: പൂക്കോട് വെറ്ററിനറി കോളേജ് വിദ്യാര്‍ത്ഥി സിദ്ധാര്‍ത്ഥന്റെ മരണത്തില്‍ സിബിഐ പ്രാഥമിക കുറ്റപത്രം സമര്‍പ്പിച്ചു. എറണാകുളം സിജെഎം കോടതിയിലാണ് കുറ്റപത്രം സമര്‍പ്പിച്ചത്. അറസ്റ്റിലായ പ്രതികള്‍ക്ക് ജാമ്യം ലഭിക്കാതിരിക്കാനാണ് വേഗത്തിലുള്ള നടപടി.
കേസില്‍ പൊലീസ് അറസ്റ്റ് ചെയ്ത 20 പേരെ പ്രതികളാക്കിയാണ് പ്രാഥമിക കുറ്റപത്രം. നേരത്തേ സിബിഐ ഉദ്യോഗസ്ഥര്‍ സിദ്ധാര്‍ത്ഥിന്റെ കോളേജ് ക്യാമ്പസിലെത്തി വിശദ പരിശോധന നടത്തിയിരുന്നു. മുന്‍ വിസി, ഡീന്‍, കോളേജ് വിദ്യാര്‍ത്ഥികള്‍ എന്നിവരുടെയെല്ലാം മൊഴിയെടുത്തു.
സിദ്ധാര്‍ത്ഥിന്റെ മരണം സംഭവിക്കുന്നത് ഫെബ്രുവരി 18നാണ്. ഇതിന് ശേഷം 90 ദിവസത്തിനകം പ്രാഥമിക കുറ്റപത്രം സമര്‍പ്പിച്ചില്ലെങ്കില്‍ അറസ്റ്റിലായ പ്രതികള്‍ക്ക് ജാമ്യം ലഭിക്കും. ഇത് കണക്കിലെടുത്താണ് സിബിഐ സംഘം വേഗത്തില്‍ കുറ്റപത്രം സമര്‍പ്പിച്ചത്.
