കോട്ടയം: തൊടുപുഴയിലെ സ്വകാര്യ സ്ഥാപനത്തില്‍നിന്ന് ജോലി കഴിഞ്ഞ് വീട്ടിലേക്ക് മടങ്ങിയ യുവതിയെ കാറില്‍ പിന്തുടര്‍ന്ന് ശല്യം ചെയ്യുകയും അശ്ലീല ആംഗ്യങ്ങള്‍ കാണിക്കുകയും ചെയ്ത കേസില്‍ സിവില്‍ പൊലീസ് ഓഫീസര്‍ക്ക് ഒപ്പം ഉണ്ടായിരുന്ന അഡ്വക്കേറ്റ് ജനറല്‍ ഓഫീസിലെ ഉദ്യോഗസ്ഥന്‍ അജേഷ് അറസ്റ്റിലായി. തുടക്കത്തില്‍ ഇയാളെ സംരക്ഷിക്കുന്ന നിലപാടാണ് പൊലീസ് സ്വീകരിച്ചത്. മുഖ്യപ്രതി സിപിഓ മര്‍ഫിക്ക് ഒപ്പം കാറിലുണ്ടായിരുന്ന ഇയാളെ തിരിച്ചറിയാന്‍ കഴിഞ്ഞിട്ടില്ലെന്നാണ് പൊലീസ് ഇതുവരെ പറഞ്ഞിരുന്നത.് ഇക്കാര്യത്തിലെ കള്ളക്കളി വാര്‍ത്തയായതോടെയാണ് ഇപ്പോള്‍ അറസ്റ്റ് ചെയ്ത്് ജാമ്യത്തില്‍ വിട്ടത്.
സംഭവത്തില്‍ കുളമാവ് സ്റ്റേഷനിലെ സിവില്‍ പൊലീസ് ഓഫീസര്‍ ഒ.എം.മര്‍ഫി നേരത്തെ അറസ്റ്റിലായിരുന്നു. ഇയാളെ ജില്ലാ പൊലീസ് മേധാവി സസ്‌പെന്‍ഡ് ചെയ്തിരിക്കയാണ്.
കഴിഞ്ഞ ബുധനാഴ്ച വൈകിട്ട് ആയിരുന്നു കേസിനാസ്പദമായ സംഭവം. യുവതി വൈകിട്ട് വീട്ടിലേക്ക് മടങ്ങുമ്പോഴാണ് മര്‍ഫിയും അജേഷും കാറില്‍ പിന്തുടരുകയും അശ്ലീല ആംഗ്യങ്ങള്‍ കാണിക്കുകയും ചെയ്തത്. തുടര്‍ന്ന് കാര്‍ കുറുകെയിട്ട് പൊലീസുകാരന്‍ ഇറങ്ങിവന്നപ്പോള്‍ യുവതി സമീപത്തെ കടയിലേക്ക് ഓടിക്കയറി രക്ഷപ്പെടുകയായിരുന്നു. പൊലീസില്‍ പരാതി നല്‍കിയതിനെത്തുടര്‍ന്ന് സി.സി.ടി.വി ദൃശ്യങ്ങളുടെ അടിസ്ഥാനത്തിലാണ് മര്‍ഫിയെ തിരിച്ചറിഞ്ഞതും കേസെടുത്തതും.
