പത്തനംതിട്ട: ശബരിമല ധര്മശാസ്താ സന്നിധിയില് വിഷു- മേടമാസ പൂജകള്ക്കായി നട നാളെ തുറക്കും. 14-നാണ് വിഷുക്കണി ദര്ശനം. പൂജകള് പൂര്ത്തിയാക്കി ശബരീശ നട 18 നാണ് അടയ്ക്കുക.
നാളെ വൈകിട്ട് 5ന് തന്ത്രി കണ്ഠര് മഹേഷ് മോഹനരുടെ സാന്നിധ്യത്തില് മേല്ശാന്തി പി.എന്. മഹേഷ് ശ്രീകോവില് തുറന്ന് ദീപങ്ങള് തെളിയിച്ച് ഭക്തജന സാന്നിധ്യം അറിയിക്കും. ഇതിനു ശേഷം ഉപദേവതാ നടകളും തുറന്ന് മേല്ശാന്തി വിളക്കുകള് തെളിയിക്കും. തുടര്ന്ന് പതിനെട്ടാം പടിക്ക് മുന്നിലായുള്ള ആഴിയില് അഗ്നി പകരും. ഇതോടെ കാത്തുനില്ക്കുന്ന അയ്യപ്പഭക്തരെ പതിനെട്ടാംപടി ചവിട്ടി ദര്ശനത്തിന് അനുവദിക്കും.
മാളികപ്പുറം മേല്ശാന്തി മുരളി നമ്പൂതിരി മാളികപ്പുറം ക്ഷേത്ര നടതുറന്ന് ഭക്തര്ക്ക് മഞ്ഞള് പ്രസാദം നല്കും. നട തുറക്കുന്ന നാളെ പ്രത്യേക പൂജകള് ഉണ്ടാകില്ല. 11ന് പുലര്ച്ചെ 5 മണിക്ക് ക്ഷേത്രനട തുറക്കും. അന്നു മുതല് നെയ്യഭിഷേകം ഉണ്ടാവും.
മേടം ഒന്നായ 14ന് പുലര്ച്ചെ 3 മണിക്ക് നട തുറക്കും. തുടര്ന്ന് വിഷുക്കണി ദര്ശനം നടക്കും. തന്ത്രിയും മേല്ശാന്തിയും ഭക്തര്ക്ക് വിഷുക്കൈനീട്ടം നല്കും. തുടര്ന്ന് പതിവ് അഭിഷേകവും നെയ്യഭിഷേകവും ഗണപതി ഹോമവും നടക്കും. പൂജകള് പൂര്ത്തിയാക്കി 18ന് രാത്രി 10 നാണ് നട അടയ്ക്കുക.
