തിരുവനന്തപുരം: പ്രളയത്തില്‍ വീട് തകര്‍ന്നതിന് നഷ്ടപരിഹാരം നല്‍കാന്‍ കാലതാമസമുണ്ടായതിന് പലിശ ഉള്‍പ്പെടെ പണം നല്‍കാന്‍ മനുഷ്യാവകാശ കമ്മിഷന്‍ ഉത്തരവ്.
2018ല്‍ ജില്ലാ ഭരണകൂടം നല്‍കാന്‍ തീരുമാനിച്ച നഷ്ടപരിഹാരമായ 47,500 രൂപ നിര്‍ധന വീട്ടമ്മയുടെ അക്കൗണ്ടിലേക്ക് കൈമാറാന്‍ അഞ്ച് വര്‍ഷത്തെ കാലതാമസമെടുത്ത സാഹചര്യത്തില്‍ 2018 മുതല്‍ 2023 വരെയുള്ള ബാങ്ക് പലിശ നല്‍കണമെന്ന് ഉത്തരവില്‍ പറയുന്നു. നേമം ശാന്തിവിളയില്‍ താമസിക്കുന്ന കെ.ജി. കൃഷ്ണവേണി സമര്‍പ്പിച്ച പരാതിയിലാണ് നടപടി. 2018 സപ്തം. 5ന് പരാതിക്കാരിയുടെ വീട് പ്രകൃതിക്ഷോഭത്തില്‍ തകര്‍ന്നു. വീട് താമസയോഗ്യമല്ലാതായതിനെ തുടര്‍ന്ന് കൃഷ്ണവേണി വാടകവീട്ടിലേക്ക് മാറി. റവന്യൂ വിഭാഗത്തിന്റെ പരിശോധനകള്‍ക്ക് ശേഷം 47,500 രൂപ നല്‍കാന്‍ തീരുമാനിച്ചെങ്കിലും തുടര്‍ നടപടികള്‍ ഉണ്ടായില്ല. ഇതോടെയാണ് പരാതിക്കാരി മനുഷ്യാവകാശ കമ്മിഷനെ സമീപിച്ചത്.
ഇതോടെ കമ്മിഷന്‍ തിരുവനന്തപുരം തഹസില്‍ദാരെ സമന്‍സ് അയച്ചു വരുത്തി. സമന്‍സ് ലഭിച്ചതോടെ 47,500 രുപ പരാതിക്കാരിയുടെ അക്കൗണ്ടിലേക്ക് ജില്ലാ ഭരണകൂടം കൈമാറി.
എന്നാല്‍ അനുവദിച്ച തുക പരാതിക്കാരിയുടെ ബാങ്ക് അക്കൗണ്ടിലേക്ക് കൈമാറാന്‍ വൈകിയതുമായി ബന്ധപ്പെട്ട് റവന്യൂ ഉദ്യോഗസ്ഥര്‍ക്ക് വീഴ്ച സംഭവിച്ചിട്ടുണ്ടോ എന്നറിയാന്‍ റവന്യൂ വിജിലന്‍സ് വിഭാഗം പരിശോധന നടത്തി തുടര്‍നടപടികള്‍ സ്വീകരിക്കണമെന്ന് കമ്മിഷന്‍ ആക്ടിങ് ചെയര്‍പേഴ്‌സണും ജൂഡീഷ്യല്‍ അംഗവുമായ കെ. ബൈജൂനാഥ് ആവശ്യപ്പെട്ടു. പരാതിക്കാരിക്കും ഭിന്നശേഷിക്കാരനായ മകനും പരിമിതമായ തുക നല്‍കാന്‍ 5 വര്‍ഷത്തെ കാലതാമസമുണ്ടായത് ഖേദകരമാണ്. സാധു സ്ത്രീ താലൂക്ക് ഓഫീസുകള്‍ നിരവധി തവണ കയറിയിറങ്ങി. പരാതിക്കാരിയുടെ മനുഷ്യാവകാശം ധ്വംസിക്കപ്പെട്ടതായും കമ്മിഷന്‍ ഉത്തരവില്‍ പറഞ്ഞു. ലാന്റ് റവന്യൂ കമ്മിഷണര്‍ക്കും ജില്ലാ കളക്ടര്‍ക്കുമാണ് കമ്മിഷന്‍ നിര്‍ദ്ദേശം നല്‍കിയത്.
