കോട്ടയം: ആനിക്കാട് സ്വദേശിയായ യുവാവിന്റെ ശരീരത്തില്‍ നിന്ന് 43 കിലോ ഭാരമുള്ള ട്യൂമര്‍ നീക്കം ചെയ്ത് കോട്ടയം മെഡിക്കല്‍ കോളേജ് ആശുപത്രി. നെഞ്ചില്‍ നിന്ന് തലയുടെ ഒരുവശം വരെ വളര്‍ന്ന ട്യൂമര്‍ ആണ് നീക്കം ചെയ്തത്. ഇന്ത്യയിലെ പ്രമുഖ ആശുപതികള്‍ പോലും കയ്യൊഴിഞ്ഞ കോണ്‍ട്രോസര്‍ക്കോമാ ആണ് കോട്ടയം മെഡിക്കല്‍ കോളജിലെ ഡോക്ടര്‍മാരുടെ മികവില്‍ അത്യഅപൂര്‍വ്വ ശസ്ത്രക്രിയയിലൂടെ നീക്കം ചെയ്തത്. ഡോക്ടര്‍ ടി.കെ. ജയകുമാറിന്റെ നേതൃത്വത്തിലാണ് അപൂര്‍വ്വമായ ശസ്ത്രക്രിയ നടത്തിയത്.
ബികോം പഠനം കഴിഞ്ഞ് ലോജിസ്റ്റിക്ക് കോഴ്‌സും പൂര്‍ത്തിയാക്കി ജോലിയില്‍ ഇരിക്കെ മൂന്നു വര്‍ഷം മുന്‍പാണ് രോഗബാധ ഉണ്ടായത്. അന്നുമുതല്‍ ഒരോ ആശുപത്രി കയറിയിറങ്ങുകയായിരുന്നു യുവാവ് . ശസ്ത്രക്രിയ സാധ്യമല്ല എന്ന് പറഞ്ഞ് മടക്കുകയായിരുന്നു എല്ലാവരും.
ഒടുവിലാണ് കോട്ടയത്ത് എത്തിയത്. ശ്വാസകോശത്തിന്റെ ഒരുഭാഗവും വാരിയെല്ലുകളും നെഞ്ചിന്റെ ഇടതു ഭാഗവുമൊക്കെ നീക്കം ചെയ്യേണ്ടിവന്നു. അതെല്ലാം പ്ലാസ്റ്റിക്ക് സര്‍ജറിയിലൂടെ പൂര്‍വ്വസ്ഥിതിയിലാക്കുകയായിരുന്നു.
കാര്‍ഡിയോ തൊറാസിക്ക് വിഭാഗവും, പ്ലാസ്റ്റിക്ക് സര്‍ജറി വിഭാഗവും സംയുക്തമയാണ് മണിക്കുറുകള്‍ നീണ്ടുനിന്ന ശസ്ത്രക്രിയ നടത്തിയത്.
