കൊച്ചി: കിഫ്ബി മസാല ബോണ്ടില്‍ വിദേശ നാണയ നിയമ ലംഘനവുമായി ബന്ധപ്പെട്ട് തോമസ് ഐസക്കിനെ ചോദ്യം ചെയ്യേണ്ടതിന്റെ ആവശ്യകത ബോധ്യപ്പെടുത്തണമെന്ന് എന്‍ഫോഴ്സ്മെന്റ് ഡയറക്ടറേറ്റിനോട് ഹൈക്കോടതി.കുറഞ്ഞപക്ഷം കോടതിയെ എങ്കിലും ബോധ്യപ്പെടുത്തണമെന്ന് സിംഗിള്‍ ബെഞ്ച് പറഞ്ഞു. ഇതുമായി ബന്ധപ്പെട്ട രേഖകള്‍ ചൊവ്വാഴ്ച ഹാജരാക്കണമെന്നും ഹൈക്കോടതി ഇഡിയോട് ആവശ്യപ്പെട്ടു.
കടുത്ത നിലപാട് പാടില്ലെന്ന ഇടക്കാല ഉത്തരവ് നിലനില്‍ക്കുമെന്ന് കോടതി പറഞ്ഞു.അറസ്റ്റ് പാടില്ലെന്ന ഉത്തരവ് ഹൈക്കോടതി നീട്ടി.
കിഫ്ബി മസാല ബോണ്ടിലെ അന്വേഷണത്തിനായി ഇഡി നല്‍കിയ സമന്‍സ് ചോദ്യം ചെയ്ത് നല്‍കിയ ഹര്‍ജിയിലായിരുന്നു ഹൈക്കോടതിയുടെ നടപടി.ഫെമ നിയമലംഘനത്തില്‍ അന്വേഷണത്തിന് ഇഡിക്ക് അധികാരമില്ലെന്നാണ് തോമസ് ഐസക്കിന്റെ വാദം.
മന്ത്രിയായിരുന്നത് മൂന്ന് വര്‍ഷം മുന്‍പാണെന്നും കിഫ്ബി തീരുമാനങ്ങള്‍ സംബന്ധിച്ച് കൂടുതല്‍ ഒന്നും പറയാനില്ലെന്നുമാണ് തോമസ് ഐസക്കിന്റെ വാദം. എന്നാല്‍ തോമസ് ഐസക്കിനെ ചോദ്യം ചെയ്യേണ്ടത് അനിവാര്യമാണെന്നാണ് ഇഡിയുടെ നിലപാട്.
