കോട്ടയം: ഹിന്ദു, ക്രൈസ്തവ സഹോദരങ്ങള്‍ക്ക് പൗരത്വം ലഭിക്കാതിരിക്കാന്‍ നികുതിപ്പണം ഉപയോഗിച്ച് സുപ്രീംകോടതിയില്‍ പോകാനുള്ള പിണറായി സര്‍ക്കാര്‍ തീരുമാനം ജനങ്ങളോടുള്ള വഞ്ചനയാണെന്ന് ബിജെപി ദേശീയ നിര്‍വാഹക സമിതിയംഗം പി.കെ. കൃഷ്ണദാസ്.
കേരളത്തില്‍ വിദ്വേഷത്തിന്റെ രാഷ്‌ട്രീയമാണ് എല്‍ഡിഎഫും മുഖ്യമന്ത്രിയും പ്രചരിപ്പിക്കുന്നത്. എട്ടുവര്‍ഷത്തെ ഭരണപരാജയം മറച്ചുവെച്ച് മുസ്ലിം ജനവിഭാഗത്തെ തെറ്റിദ്ധരിപ്പിക്കുകയാണ് മുഖ്യമന്ത്രി. മൂന്ന് അയല്‍ രാജ്യങ്ങളില്‍ നിന്നും പീഡിപ്പിക്കപ്പെട്ട് അഭയം തേടിയ അന്നാട്ടിലെ ന്യൂനപക്ഷങ്ങള്‍ക്ക് പൗരത്വം നല്കുന്നതാണ് പുതിയ നിയമ ഭേദഗതി. പീഡിതരായ ഹിന്ദു, ക്രൈസ്തവ വിഭാഗങ്ങള്‍ക്ക് പൗരത്വം നല്കുന്നതില്‍ എന്താണ് തെറ്റെന്ന് കൃഷ്ണദാസ് വാര്‍ത്താസമ്മേളനത്തില്‍ ചോദിച്ചു. മുഖ്യമന്ത്രി തീവ്രവാദ പ്രവര്‍ത്തനങ്ങളിലേക്കുള്ള റിക്രൂട്ടിങ് ഏജന്റായി അധപതിച്ചിരിക്കുകയാണെന്ന് അദ്ദേഹം പറഞ്ഞു.
വാര്‍ത്താസമ്മേളനത്തില്‍ ബിജെപി കോട്ടയം ജില്ലാ പ്രസിഡന്റ് ജി. ലിജിന്‍ ലാല്‍, ബിഡിജെഎസ് സംസ്ഥാന വൈസ് പ്രസിഡന്റ് കെ. പത്മകുമാര്‍ പങ്കെടുത്തു.
