ബെംഗളൂരു: ഭാരതത്തിന്റെ ബഹിരാകാശ മേഖലയിലെ സ്റ്റാര്‍ട്ടപ്പായ അഗ്നികുല് കോസ്മോസിന്റെ ആദ്യത്തെ റോക്കറ്റ് വിക്ഷേപണം മാറ്റിവച്ചു. അഗ്നികുല് വികസിപ്പിച്ച അഗ്നിബാന് സബ് ഓര്‍ബിറ്റല്‍ ടെക്ക് ഡെമോണ്‍സ്ട്രേറ്റര്‍ റോക്കറ്റ് ഇന്ന് വിക്ഷേപിക്കുമെന്നായിരുന്നു നേരത്തെ അറിയിച്ചിരുന്നത്. എന്നാല്‍ സാങ്കേതിക തകരാറുകളെ തുടര്‍ന്ന് വിക്ഷേപണം മാറ്റിയതായി അഗ്നികുല് കോസ്മോസ് അറിയിച്ചു. വിക്ഷേപണ തീയതിയും സമയവും പിന്നീട് അറിയിക്കും.
വെറും രണ്ട് മിനിട്ട് മാത്രം ദൈര്‍ഘ്യമുള്ള വിക്ഷേപണ ദൗത്യമാണിത്. ശ്രീഹരിക്കോട്ടയിലെ സതീഷ് ധവാന്‍ ബഹിരാകാശ നിലയത്തിലുള്ള ഭാരതത്തിലെ ആദ്യ സ്വകാര്യ വിക്ഷേപണത്തറയായ എഎല്‍പി-01 ല്‍ നിന്നാണ് വിക്ഷേപണം. വിക്ഷേപണ ശേഷം രണ്ട് മിനിറ്റില്‍ റോക്കറ്റ് കടലില്‍ പതിക്കും. ലോകത്തിലെ ആദ്യത്തെ സിംഗിള്‍ പീസ് ത്രിഡി പ്രിന്റ്ഡ് സെമി ക്രയോജനിക് റോക്കറ്റ് എഞ്ചിനായ അഗ്നിലെറ്റ് എഞ്ചിന്റെ പരീക്ഷണമാണ് ദൗത്യത്തിലൂടെ ലക്ഷ്യമിടുന്നത്. പൂര്‍ണമായും തദ്ദേശീയമായി വികസിപ്പിച്ച അഗ്നിബാന് സബ് ഓര്‍ബിറ്റല്‍ ടെക്ക് ഡെമോണ്‍സ്ട്രേറ്റര്‍ ഒരു സ്റ്റേജ് മാത്രമുള്ള പരീക്ഷണ റോക്കറ്റാണ്. 6.2 മീറ്ററാണ് റോക്കറ്റിന്റെ ഉയരം.
ഭാരതത്തില്‍ നിന്നുള്ള ആദ്യത്തെ എഥര്‍നെറ്റ് അധിഷ്ഠിത ഏവിയോമിക് ആര്‍ക്കിടെക്ചറും ഓട്ടോപൈലറ്റ് സോഫ്റ്റ്‌വെയറും ഉപയോഗിച്ചാണ് ഇതിന്റെ നിര്‍മിതി. സബ് കൂള്‍ഡ് ലിക്വിഡ് ഓക്‌സിജനും ഏവിയേഷന്‍ ടര്‍ബൈനും ഇന്ധനമായി ഉപയോഗിക്കുന്ന റോക്കറ്റില്‍ നാല് കാര്‍ബണ്‍ കോമ്പോസിറ്റ് ഫിനുകള്‍ സ്ഥാപിച്ചിട്ടുണ്ട്. 2017 ല്‍ എയറോസ്പേസ് എന്‍ജിനീയര്‍മാരായ ശ്രീനാഥ് രവിചന്ദ്രനും എസ്.പി.എം. മോയിനും ചേര്‍ന്നാണ് അഗ്നികുല് കോസ്മോസ് സ്ഥാപിച്ചത്.
