അയോദ്ധ്യ: ഹിന്ദു ദൈവങ്ങളെ അവഹേളിക്കുന്നവരെ ജയിലിലടയ്‌ക്കണമെന്ന് അയോദ്ധ്യ രാമജന്മഭൂമി ക്ഷേത്രത്തിലെ മുഖ്യ പുരോഹിതന്‍ ആചാര്യ സത്യേന്ദ്ര ദാസ്. കോണ്‍ഗ്രസ് നേതാവ് രാഹുലിന്റെ ശക്തി വിരുദ്ധ പരാമര്‍ശത്തിനെതിരെയാണ് രൂക്ഷവിമര്‍ശനവുമായി അദ്ദേഹം രംഗത്തെത്തിയത്. നേതാക്കളുടെ ഇത്തരത്തിലുള്ള അഭിപ്രായപ്രകടനങ്ങളാണ് കോണ്‍ഗ്രസിനെ തരംതാഴ്‌ത്തിയതെന്ന് അദ്ദേഹം പറഞ്ഞു.
രാഹുലിന്റെ പരാമര്‍ശത്തെ അപലപിക്കുന്നു. കോണ്‍ഗ്രസ് ഒരു ഹിന്ദുവിരുദ്ധ പാര്‍ട്ടിയാണ്. ഭാരതത്തില്‍ ഹിന്ദു ഭൂരിപക്ഷമാണ്. നാരീശക്തി സനാതനധര്‍മ്മത്തിന്റെ അഭിമാനമാണ്, ആചാര്യ സത്യേന്ദ്ര ദാസ് പറഞ്ഞു. മഹാരാഷ്‌ട്രയില്‍ കഴിഞ്ഞ ദിവസം ഭാരത് ജോഡോ ന്യായ് യാത്രയുടെ സമാപനത്തോടനുബന്ധിച്ചുള്ള സമ്മേളനത്തിലാണ് രാഹുല്‍ വിവാദ പരാമര്‍ശം നടത്തിയത്. ഹിന്ദിയില്‍ ശക്തി എന്നൊരു വാക്ക് ഉണ്ട്.
ഞങ്ങള്‍ ആ ഒരു ശക്തിക്കെതിരെയാണ് പോരാടുന്നത്, എന്താണ് ആ ശക്തി, നാം അധികാരത്തോടാണ് പോരാടിക്കൊണ്ടിരിക്കുന്നതെന്നാണ് രാഹുല്‍ പറഞ്ഞത്. രാഹുലിന്റെ പരാമര്‍ശത്തെ ബിജെപി രൂക്ഷമായി വിമര്‍ശിച്ചു. ഹിന്ദുക്കള്‍ മാ ദുര്‍ഗയെ ആരാധിക്കുന്നു. അവള്‍ ശക്തിയാണ്. ഞങ്ങള്‍ ശക്തിയോട് യുദ്ധം ചെയ്യുന്നില്ല. പണ്ടുമുതലേ, അസുരന്മാര്‍ ശക്തിയോട് യുദ്ധം ചെയ്യാന്‍ ശ്രമിച്ചു, നശിക്കുകയാണ് ചെയ്തതെന്നും ബിജെപി നേതാവ് അമിത് മാളവ്യ എക്സില്‍ കുറിച്ചു.
